Հետզհետէ սովորական երեւոյթ դարձած է ընդդիմադիր կուսակցութիւններու նուաճած քաղաքապետարաններու դէմ յարուցուող դատական հարցաքննութիւնները:
Իբրեւ այդ սովորութեան վերջին օրինակ, 11 Մարտի լրահոսով հրապարակուեցաւ Մալթեփէ, Սարըյէր եւ Շիշլիի քաղաքապետարաններու անձնակազմէն 32 նախկին կամ գործող պաշտօնեաներու բերման ենթարկումը:
Այս նոր դատական հետապնդման ետին կայ բողոքի բնոյթով վկայութիւն մը, որուն համաձայն նշեալ քաղաքապետարանները 2014 եւ 2016 թուականներու միջեւ ապօրինի դրամի փոխանցում կատարած են ՏՀՔԲ-Ճ ահաբեկչական կազմակերպութեան:
Ինքնին այս պնդումը իսկ բաւարար է համոզուելու թէ, կատարուած մեղադրանքը զուրկ է օրինական հիմքէ եւ չունի տրամաբանական բացատրութիւն:
Միւս կողմէ յստակացման շէմին է Իսթանպուլի քաղաքապետ Էքրեմ Իմամօղլուի նախագահի թեկնածութիւնը: Այս զարգացումին զուգահեռ թափ տրուած է իր դէմ զանազան հարցաքննութիւններու: Վերջապէս արդարադատական բնոյթով ճնշումները հասած են նաեւ իր անձնակազմին ու բարեկամներուն: Այսպէս բազմաթիւ անհտներու կալուածներուն, ինքնաշարժերուն եւ դրամատնային հաշիւները կալանքի տակ դրուած են, տեղի տալով բազմաբնոյթ դժուարութիւններու:
Ծիծաղելի մեղադրանք մըն ալ ուղուած է յայտնի համտեսող Վետաթ Միլորին:Ան վերջերս այցելած էր քաղաքապետարանի իբրեւ աղքատ զանգուածի ծառայելու համար գործող ճաշարաններէն մէկուն: Իր սոցցանցի մէջ գնահատանքով արտայայտուած էր այդտեղ մատուցուող ճաշերու որակին մասին: Արեւտրական Նախարարութիւնը այդ հրապարակումը որակեց իբրեւ քօղարկուած գովազդ եւ համտեսողը ստիպուեցաւ դատարան երթալ ու յայտ ներկայացնել իր դրուատալից խօսքերուն համար:
