ՈՒՅԿԱՐ ԿԻՒԼԹԷՔԻՆ
uygargultekin@agos.com
Նախապէս անդրադարձած էինք Պոյաճըգիւղի Սուրբ Երից Մանկանց Եկեղեցւոյ Թաղական խորհուրդի ատենապետ Նազարէթ Էօզսահակեանի այն դիմումը, որ ուղղուած էր Կրօնից Տեսչութեան եւ որպէս քաղաքացիական իրաւունք կը պահանջէր որ այս հաստատութիւնը ինչպէս իմամներու ամսավճարները, ստանձնէ նաեւ քրիստոնեաներու քահանաներուն ամսականները եւս։ Սակայն Տեսչութիւնը նկատի չէր ունեցած թաղականութեան այս պահանջարկը պատասխանելով որ քահանաներու համար ճշդուած նման վճարում մը գոյութիւն չունի։ Կրօնից Տեսչութեան այս մերժող պատասխանէն ետք ատենապետը 2013-ի Յուլիսին դիմած է Օմպուցմենին, իբրեւ հաշտարար։ Օմպուցմենը այս մասին կարծիք հարցուցած է Հրէից Ռաբունապետութեան, Թուրքիոյ Հայոց Պատրիարքարանին, Ասորի Ուղղափառ Պատրիարքարանին եւ Յունաց Տիեզերական Պատրիարքարանին։ Քրիստոնեայ եւ հրեայ հոգեւորականները իրենց միջեւ խորհրդակցելէ ետք, Տիեզերական Պատրիարքի ստորագրութեամբ ներկայացուցած են հետեւեալ առաջարկը՝ «քրիստոնեայ եւ հրեայ հոգեւորականները կը հպատակին եկեղեցիի յատուկ աստիճանակարգի, ուստի տեղին պիտի ըլլայ պետութեան նման ծառայութիւններու համար կատարելիք փոխանցումը յանձնել այս հաստատութիւններուն»։ Օմպուցմեն բացի այս խորհրդակցութենէ բանակցութիւններ ունեցած է Արտաքին եւ Ներքին Գործոց Նախարարութիւններու, Վաքըֆներու Ընդհանուր Տնօրէնութեան, Ելմտական Նախարարութեան, Կրօնից Տեսչութեան եւ Պետական Պաշտօնէութեան ներկայացուցիչներուն հետ։ Այսպէս Պիւտճէի եւ Տնտեսական Քննութեան Բաժինը յայտնեց թէ առկայ ներկայ օրէնքներու սահմանումով եկեղեցիներու մէջ պաշտօնավարող հոգեւորականներուն պետական պիւտճէէն հատուցում կատարել կարելի չէ։ Իսկ Օմպուցմեն չէ գոհացած իրեն հասնող այս պատասխանէն եւ խնդիրը դրած է Լոզանի Դաշնագրին եւ սահմանադրութեան պահանջած քաղաքացիներու հաւասարութեան սկզբունքի ծիրին մէջ։ Այս զարգացումներէն ետք, բոլորին համար խիստ հետաքրքրական է տեսնել թէ խնդիրը դէպի ո՞ւր պիտի յանգի։ Բոլոր այս զարգացումներէն վերջ Օմպուցմենը իր պատրաստած տեղեկագրին մէջ պահանջեց խնդրին փոքրամասնութեան ի նպաստ լուծումը։ «Եթէ այս յանձնարարութեան չհնազանդիք, տեղեկացուցէք պատճառաբանութիւնը» գրուած է Օմպուցմենին իշխանութիւններուն ղրկած նամակին մէջ։
