24Ապրիլի առթիւ կատարած յայտարարութիւններուն մէջ Հայոց ցեղասպանութիւն եզրը գործածելու մեղադրանքով դատուող Տիարպեքիրի Փաստաբաններու Կաճառի նախկին նախագահ Նահիթ Էրեն եւ վարչական խորհուրդի անդամները վեցերորդ անգամ անպածտ հռչակուեցան:
Տիարպեքիրի Փաստաբաններու Կաճառի նախկին նախագահ Նահիթ Էրեն եւ 10 վարչական խորհուրդի անդամները 24 Ապրիլ 2021-ին «Մեծ աղէտի ցաւը կիսելով» վերնագրով յայտարարութեան պատճառով հարուցուած դատական գործի դատաքննութիւնը նախորդ շաբաթ տեղի ունեցաւ: Դատական գործը յարուցուեցաւ «Պետութիւնն ու իր մարմինները հրապարակաւ նուաստացնելու» մեղադրանքով:
Դատաքննութեան ժամանակ Նահիթ Էրեն եւ այն ժամանակուայ Վարչական Խորհուրդի անդամներ՝ Զուհալ Իշիք, Մեհտի Էօզտեմիր, Սերտար Էօզեր, Տիյար Ռիւքնետտին Չեթիտիր, Էօյքիւ Չաքմաք, Հաթիճէ Տեմիր ներկայ էին:
Դատավարութեան հետեւեցան Տիարպեքիրի Փաստաբաններու Կաճառի այժմու նախագահ Ապտիւլքատիր Կիւլեչ, Խորհուրդի վարչական անդամները, ինչպէս նաեւ Մարդու Իրաւունքներու Միութեան, Թուրքիոյ Մարդու Իրաւունքներու Հիմնարկի, Փաստաբանները Ազատութեան Համար Ընկերութեան Տիարպեքիրի մասնաճիւղերու եւ «Հաք Ինիսիատիֆի» կազմակերպութեան Տիարպեքիրի ներկայացուցչութեան ղեկավարներն ու անդամները:
Դատավարութեան ժամանակ դատախազութիւնը «յանցագործութեան օրինական տարրերը չկազմուելու» պատճառով բոլոր մեղադրեալներու արդարացման որոշում կայացնելը պահանջեց:
Նահիթ Էրեն նշեց, որ իրենց նպատակը Թուրքիոյ անցեալի հետ առերեսուելը եւ ընկերութեան բոլոր հասարակական խնդիրներուն ուշադրութիւն դարձնելն է: Դատարանը յանցագործութեան օրինական տարրերը չկազմուելու պատճառով բոլոր մեղադրեալներու համար արդարացում վճռեց:
Տիարպեքիրի Փաստաբաններու Կաճառը արդէն նախապէս ալ նոյն մեղադրանքով դատուած եւ արդարացուած էր:
