Թուրքիա յաճախ կը ցնցուի աղիտալի պատահարներով։ Այդ առումով վերջին դէպքը պատահեցաւ 21 Յունուարին, երբ Պոլու, Քարթալքայա վայրի հիւրանոցներէն մէկուն մէջ 76 անձեր բոցերու զոհը դարձան։
Յատկապէս ձմրան զբօսաշրջութեան կարեւոր կէտերէն մէկն էր Պոլու քաղաքի Քարթալքայա գաւառը, ուր բազում դրութիւններ կան դահուկասահկի համար։
Դպրոցներու տարեմիջեան արձակուրդի բերումով հիւրանոցը բաւականին ծանրաբեռնուած էր այցելուներով։ Ըստ առաջին տուեալներու, հրդեհը ծագեցաւ խոհանոցի մէջ եւ շուտով տարածուեցաւ ամբողջ շէնքն վեր։ Արդէն հրդեհի ծագած պահուն լրատւութիւնը արգիլուեցաւ Ռատիօներու եւ Հեռուստակայաներու Վերին Խորհուրդի որոշումով։ Այդ պահուն արդէն կը խօսուէր երեք զոհերու մասին, որոնցմէ երկուքը սարսափի եւ խուճապի մատնուելով լուսամուտէն դուրս նետած էին զիրենք։
Նոյն օր երեկոյեան ժամերուն պարզուեցաւ որ հրդեհը շատ աւելի ծանր հետեւանքներ ունեցավ խլելով 76 կեանքեր։
Եթէ իւրաքանչիւր աղէտ իր կարգին եզակի է, կարելի է ըսել թէ իւրաքանչիւր աղէտէ ետք իշխանութիւնները կ՚որդեգրեն նոյն բացատրութեան եղանակները։ Անոնք ամենայն ձեռնհասութեամբ կը սպրդին պատասխանատւութեան որեւէ մեղադրանքէ եւ իրենք են որ մեղադրանքներ կը հնչեցնեն զանազաններու հասցէին։
Նոյնը պատահեցաւ այս անգամ ալ, երբ իշխանամէտ մամուլը իր մեղադրանքի սլաքները ուղղեց դէպի Պոլուի քաղաքապետարանին, քանի որ այս վերջինը կը պատկանի ընդդիմադիր կուսակցութեան։ Մինչդեռ քաղաքապետը կը փորձէր հաստատել թէ հիւրանոցի գտնուած վայրը իր իրաւասնութեան սահմաններէն դուրս է եւ այդ գաւառի հսկողութիւնը կը վիճակի Զբօսաշրջութեան Նախարարութեան։
Ով ինչ որ ուզէ թող ըսէ, իրողութիւնը յստակ է 79 շունչեր հանգչեցան կանխամիջոցներու անբաւարարութեան հետեւանքով։ Այս առթիւ շատեր կը յիշեն Ֆրանց Քաֆքայի «Ժանտախտ» վէպին մէջ անցնող «Երկրի մը մակարդակը կը պարզուի մարդկանց մեռնելու պատճառներով» նախադասութիւնը։
Հրդեհի զոհերուն համար ՀՀ Վարչապետ Նիքոլ Փաշինեան ցաւակցագիր մը հրապարկեց X-ի իր հաշւոյն վրայ զոհուածներու ընտանիքներու կսկիծը բաժնելով։
ՀՀ Արտաքին Գործոց Նախարարութիւնը եւս ցաւակցագիր մը ուղղեց իր թուրքիացի պաշտօնակիցին։
Թուրքիոյ Հայոց Պատրիարքարանը եւս ցաւակցագիրով մը մխիթարութիւն մաղթեց զոհուածներու մերձաւորներուն։
Հրդեհի պատճառաւ միօրեայ ազգային սուգ հռչակուեցաւ։
