Եդուարդ Թովմասեան հոգեճաշով մը յիշատակուեցաւ Պուրկազ Կղզիի ալեւիներու աղօթատեղիին մէջ։
Կատարուածը կտակի իրականացում մըն էր, ձեռամբ Թովմասեանի ամենամտերիմ ընկերներէն Խաչիկ Աբելիկանի։
Եդուարդ Թովմասեան յաճախ կ՚այցելէր իր բնակարանին հարեւանութեամբ գտնուող ճեմ էվին։ Բարեկամացած էր այդ սրբավայրի պարտիզպանին եւ այլ աշխատողներուն։ Անոնց հրաւէրով ինք եւս մասնակցած էր նման բնոյթի հաւաքոյթներուն։
Այս բոլորը նկատի ունենալով ան ընկերոջ Խաչիկին յանձնարարած էր, որ իր մահէն ետք ալ նման հոգեճաշ մը կազմակերպէ այս երդիքին տակ։
Ալեւիադաւան հասարակութեան սոցցանցերու մէջ հրապարակուած կոչին ընդառաջած էին աւելի քան 200 անձեր, որոնց շարքին էր նաեւ Թովմասեան եւ Աբելեան ընտանիքի անդամները։
Հոգեճաշի պատշաճող պարզութեամբ, բայց մեծ խնամքով պատրաստուած հոգեճաշը անգամ մը եւս առիթ դարձաւ, որ մեր սիրելի Թոմօն յետ մահու շարունակէ ի մի բերել անկեղծ զգացումներով իրարու հաղորդակինց մարդկանց։
