Լոյս տեսաւ «Ակօս»ի նախկին խմբագրապետ Ռոպէր Քոփթաշի առաջին վէպը՝ «Փշրանք»ր։
Քոփթաշ այս վէպով կը բնութագրէ հայ ընտանիքի մը Ի. դարու տեւողութեան անցուդարձները։
Բնօրրանէն դէպի մեծ քաղաք Իսթանպուլ գաղթած ընտանիքի շառաւիղները կը փորձեն նախորդ սերունդէն ժառանգուած ծանր բեռը ետին թողելով, ձեւով մը ճակատագրի պարտադրանքը շրջանցել։
Սակայն որքանո՞վ իրաւացի է այդ փախուստը, երբ սպիացած կարծուած վէրքերու խորքին կան գաղտնիքներ, պատմուածներ եւ չպատմուածներ, որոնք ստուերի մը նման կը հետեւին անհատին։ «Փշրանք»ը ո՛չ միայն ընտանիքի մը, այլ մարդկային բառի սահմանած բոլոր զգացումներու մասին պատում մըն է։
Քոփթաշ ծնած է 1977 թուին Իսթանպուլ։ Լուսաւորիչեան եւ Գարակէօզեան վարժարաններու մէջ նախնական ուսում ստանալէ ետք, իբրեւ երկրորդական վարժարան աւարտած է Սուրբ Խաչ Դպրեվանքը։ Մարմարա Համալսարանի Ճարտարագիտական Յարաբերութիւններ բաժինը աւարտելէ ետք Պողազիչի Համալսարանի մէջ ալ Գրիգոր Զոհրապի մասին ուսումնասիրութիւններով պաշտպանած է աւարտաճառը։
Տակաւին համալսարանական ուսանողութեան տարիներուն, իբրեւ խմբագիր աշխատակցած է «Արաս» հրատարակչատան։
2015-2023 թուականներու միջեւ ստանձնած է «Արաս»ի գլխաւոր խմբագրի պաշտօնը։
2006-ին սկսաւ «Ակօս»ի մէջ յօդուածներ ստորագրել «Կեանքը ինչպէս որ է» խորագրի ներքեւ։
2007-ին Հրանդ Տինքի սպանութենէն ետք մաս կազմեց «Ակօս»ի անձնակազմին եւ 2010-2015 թուականներու միջեւ եղաւ թերթի խմբագրապետը։
Ան բացի «Ակօս» եւ «Արաս» հրատարակչատունէ յօդուածներ գրի առաւ «Էքսփրես», «1+1», «Մեսելէ», «Նոթոս», «Թոփլումսալ Թարիհ», «Թարիհ վէ Թոփլում», «Պիրիքիմ», «Պիյանեթ», «K24», «Կազեթէ Տուվար» եւ «Սիվիլնեթ»ի նման զանազան պարբերականներու կամ համացանցի կայքէջերու վրայ։
