2016-ի Նոյեմբեր ամիսէն ի վեր Էտիրնէի բանտին մէջ ազատազրկուած քաղաքական գործիչ Սելահատտին Տեմիրթաշ «թուիթրեան» գրառումներով ջրեց իրեն դէմ ուղղուած զանազան մեղադրանքները։ Տեմիրթաշ հնարզանդ մնալով իր սովորական ոճին նախ ներողութիւն խնդրեց իր խլած ժամանակներուն համար։ «Ես արդէն գիտեմ թէ դոյզն իսկ չէք հաւատար փողոց փողոց շրջելով զիս ահաբեկիչ հռչակողներու զրպարտութիւնները։ Սակայն ուզեցի որ անգամ մըն ալ ճշմարտութիւնները իմ բերնէս լսէք»։
Ապա Տեմիրթաշ իրեն ուղղուած տասը մեղադրանքներու համար տուաւ խիստ շահեկան բացատրութիւններ։ «Նախ ինծի ձերբակալեցին ըսելով թէ Խորհրդարանի մէջ քրտերէն ելոյթ ունենալու համար գաղտնի կազմակերպութիւններէ հրահանք ստացած եմ։ Այս պնդումը ներկայացուցին գաղտնի ականատեսի մը վկայութեամբ։ Մեր յարատեւ դիմումներուն դիմաց դատախազը ստիպուեցաւ խոստովանելու թէ իրողութեան մէջ այդպէս գաղտնի վկայ մը գոյութիւն չունի։ Սակայն ի դէմ այս բոլորին զիս բանտը պահեցին։ Միւս կողմէ իմ մասին խորհրդարան մեղադրանք ներկայացնող դատախազը այս պահուն բանտարկուած է Կիւլենի հրոսախումբին անդամակցելու մեղադրանքով։ Երկրորդ պնդումը իբրեւ թէ ՓՔՔ Էլազըղ բնակող ընտանիքի մը նամակ գրած է եւ այդ նամակն ալ յանձնելու պարտականութիւնը տուած է ինծի եւ Կիւլթեն Քըշանաքին։ 2009 թուակիր այդ դաւադրութեան ուսումնասիրելով յայտնի դարձաւ թէ սոյն նամակը ուրիշներու կողմէ գրի առնուած է Սուր թաղամասի նախկին քաղաքապետ Ապտուլլահ Տեմիրպաշի համակարգչին վրայ։
Երրորդ պնդումը դարձեալ խայտառակութիւն է։ Այս անգամ զիս կը մեղադրեն գաղտնի կազմակերպութեան անդամներու հետ հեռախօսակապ ունենալով։ Աւելի ետք կը պարզուի թէ գաղտնի կազմակերպութեան անդամ ըլլալով նշուածները մեր կուսակցութեան գործիչներն են»։
Տեմիրթաշ կը շարէ նման բնոյթով հինգ մեղադրանքներ եւս, որոնց բոլորն ալ զուրկ են փաստացի պնդում ըլլալէ։ Վերջապէս ան կը նշէ թէ ԵՄԻԱ-ի վճիռները եւս ջրած են այս ամէն տեսակ օրինականութենէ զուրկ շինծու պնդումները եւ իր բանտարկութիւնը ամբողջովին քաղաքական նպատակներու հետեւանք է, այլ ոչ թէ իրաւաբանական։
