Մշոյ եւ շրջակայքի հայերու նախաձեռնութեամբ հիմնուած «Տարօն» հայրենակցական միութեան ատենապետ՝ Ֆահրետտին Ասլան լրագրողներու հետ ունեցած հանդիպման ընթացքին անդրադարձաւ քաղաքի պատմամշակութային եւ կրօնական հարստութեան կարեւորութեան։ Ան նշեց թէ Մուշ վերջերս զբօսաշրջութեան առումով կարեւոր կեդրոն մը դարձած է, ուր ամէն տարի կ՚այցելեն բազմաթիւ զբօսաշրջիկներ։ Ան ցաւ յայտնեց, ըսելով որ շրջանի պատմական շինութիւնները անտէրութեան մատնուած են եւ յարատեւ կերպով կը թալանուին գանձախոյզերու կողմէ։ Յատկապէս օրինակ բերաւ Քալէ թաղամասի մէջ գտնուող Սուրբ Աստուածածին եկեղեցին, որ դժբախտաբար աղբանոցի տեսարան մը կը պարզէ եւ զբօսաշրջիկներ կը խրտչին մօտենալու իսկ։
Ֆահրետտին Ասլան նշեց թէ քաղաքապետարանի վերանորոգման նպատակով կատարելիք աշխատութիւնները ալ աւելի կը զարգացնեն տարածաշրջանի զբօսաշրջութիւնը։ Միւս կողմէ պատուիրակութեան մը ընկերակցութեամբ Մուշ այցելած է Հայաստանի խորհրդարանի նախկին պատգամաւոր եւ աշխարհասփիւռ հայ երեսփոխաններու միութեան հիմնադիր Արագած Ախոյեանը։ Ախոյեան յայտնեց թէ Մուշ եկած են երկու ժողովուրդներու միջեւ մշակութային կապը ամրացնելու հեռանկարով։
«Մենք կը խուսափինք մեր երկիրներու միջեւ դիւանագիտական լարուածութիւններէ։ Արդարեւ այդ լարուածութիւններու հետեւանքով այսօր փակ է Հայաստան-Թուրքիա ցամաքային սահմանագիծը։ Պարտաւոր ենք նախ մեր միտքերը կաշկանդող սահմանները յաղթահարելու, որպէսզի հետզհետէ երկու երկիրներն ալ յաջողին բարեկամութիւն մշակել» ըսաւ Արագած Ախոյեան։
