ԷՄՄԱ ՊԵՏՐՈՍԵԱՆ
dzovinarlok@gmail.com
Ախթալայի Սուրբ Աստուածածին վանքի սովորական անդորրը խախտած է, բակը մարդաշատ է, երգը, պարն ու խորովածի անուշաբոյր հոտն ալ՝ ամենուր։ Այս աշխոյժ ժխորի պատճառը արդէն աւանդական դարձած Խորովածի Միջազգային 7-րդ Փառատօնն է, որ այս տարի կը կայնայ Սեպտեմբերի 12-ին։ «Ախթալա- 2015» խորովածի, արուեստի, երաժշտութեան միջազգային 7-րդ փառատօնը նախորդ տարիներու համեմատ աւելի մարդաշատ է, ինչն ալ կը վկայէ փառատօնի ձեռք բերած մեծ համբաւի մասին։ Ամէն տարի խորովածի միջազգային փառատօնին կը մասնակցին հայեր ոչ միայն Հայաստանի տարբեր մարզերէն, այլ նաեւ՝ արտերկրէն, ովքեր կը վայելեն խորովածը ու հնչող երգ-երաժշտութիւնը, կը շփուին միմեանց հետ։ Փառատօնին յայտագրուած եւ կը մասնակցեն ընտանեկան պիզնըսով զբաղուող 40 ձեռներեցներ, ներկայացած են 20 խոհարարներ, իրենց պատրաստած խորովածը ներկայացուած են ժիւրիի դատին։ Փառատօնին կը մասնակցին «Իբիցա» հիւրանոցային համալիրը, «Ազնավուր» ռեստորան-սրճարանը, Երեւանի գարեջրի ակադեմիան, Աբովեանի խոհարարական կրթահամալիրը, «Վահագնատուն» ռեստորանը եւ այլ ռեստորաններ, ինչպէս նաեւ Իջեւանի զօրամասի զինուոր խոհարարներն ու այլ խոհարարներ։ Այս տարի մեծ է նաեւ զբօսաշրջիկներու թիւը։ Յատուկ փառատօնին մասնակցելու համար Թբիլիսէն Ախթալա եկած են նաեւ Հայ Առաքելական եկեղեցւոյ Վիրահայոց թեմի վարչական ու լրատուական կազմի, ինչպէս նաեւ «Հայարտուն» կեդրոնի ներկայացուցիչներ։ Կեդրոնի մեներգչուհի Աննա Պօղոսովան փառատօնի շրջանակներուն հանդէս եկաւ նաեւ մենակատարումով։ «Վիրահայոց թեմի մամլոյ եւ լրատուութեան բաժնի տնօրէն» Սուսաննա Խաչատրեանը կը նշէ, որ իրենք արդէն երկրորդ անգամ կը մասնակցեն խորովածի փառատօնին. «Մենք 2 տարի առաջ եղած ենք այստեղ, մասնակցած փառատօնին։ Այն ժամանակ այսքան բազմամարդ չէր, այս տարի աւելի մեծ թիւով մարդիկ կը մասնակցին փառատօնին, փառատօնն ալ այս անգամ շատ աւելի լաւ կազմակերպուած է։ Պէտք է պահպանուի աւանդոյթը ու ամէն տարի կայանայ փառատօնը, սոցիալական վիճակը պէտք է պատճառ չհանդիսանայ փառատօնը ձախողելու համար։ Սա եւս ազգայինը պահպանելու ու սերունդներուն փոխանցելու միջոց է», կ՚ըսէ Սուսաննա Խաչատրեանը։
Փառատօնին մասնակցողներու ուշադրութիւնը յատկապէս գրաւած են զինուոր խոհարարներու մատուցած շիլաները։ Ախթալեցիներն իրենց հերթին Ախթալա քաղաքի բերքուբարիքը կը ցուցադրեն փառատօնի մասնակիցներուն։ Սերկէյ Բարսեղեան Ախթալայի համար 2 միջնակարգ դպրոցի աւագ դասարանի աշակերտ է, առաջին անգամ կը մասնակցի փառատօնին, կ՚ըսէ՝ իրենց սեղանիկին ներկայացուած ամբողջ բարիքները վաճառած են. «Մենք «Իմփաքթ» ծրագրի շրջանակներուն կը մասնակցինք փառատօնին, մօտ 30.000 դրամ եկամուտ ստացած ենք վաճառքէն։ Այդ գումարը կը ծախսուի Ախթալա համայնքի բարեգործական կամ բարեկարգման որեւէ ծրագրի շրջանակներուն։ Շատ հաճելի կը թուի փառատօնը, որովհետեւ այն առիթ կը հանդիսանայ, որ մարդիկ տարբեր վայրերէն ծանօթանան մեր քաղաքին ու մեր քաղաքի պատմամշակութային արժէքներուն», կ՚ըսէ փառատօնի մասնակից Սերկէյ Բարսեղեանը։
Միջոցառումներու հիմնական մասի աւարտէն ետք ժիւրին ներկայացուց խորովածի մրցոյթի արդիւնքները։ Փառատօնի բացարձակ յաղթողը ճանչցուեցաւ Երեւանի Գարեջրի Ակադեմիան։ Մասնակցութեան համար ժիւրիի սահմանած այլ անուանակարգերու վկայականներ եւ պատուոյ գրեր յանձնուեցան փառատօնի գրեթէ բոլոր մասնակից խումբերուն։
