Շաբաթ, 1 Փետրուարի կանուխ առաւօտուն, Մեթնի Պսալիմ շրջանին մէջ, Մեծի Տանն Կիլիկիոյ կաթողիկոսութեան երիտասարդ միաբաններէն եւ Պեքաա շրջանի հոգեւոր տեսուչ Անանիա Ծ. վրդ. Գուճանեան անարգ ոճիրի մը զոհ գնաց:
Անոր սպանութիւնը դատապարտումի լայն ալիք մը յառաջացուց պետական, կրօնական, քաղաքական, հասարակական եւ եկեղեցական շրջանակներու մէջ:
Հանրապետութեան նախագահ Ժոզէֆ Աուն հեռաձայնեց Արամ Ա. կաթողիկոսին եւ դատապարտեց ոճիրը` նշելով, թէ ապահովական մարմինները հետաքննութիւն կը կատարեն` բացայայտելու համար ոճրագործները, որպէսզի խստագոյն պատիժը կրեն:
Ոճիրը դատապարտուեցաւ նաեւ երեսփոխաններու եւ քաղաքական տարբեր ուժերու կողմէ։
Երեքշաբթի, 4 Փետրուարի առաւօտեան ժամը 09։30-ին, Այնճարի Սուրբ Պօղոս եկեղեցւոյ մէջ կատարուեցաւ Անանիա Ծ. վրդ. Գուճանեանի վերջին օծման արարողութիւնը։ Ապա, տեղւոյն վրայ ցաւակցութիւններ ընդունելէ ետք, անոր մարմինը փոխադրուեցաւ Անթիլիասի Մայրավանքը, ուր կէսօրէն ետք ժամը 02։30-ին, կայացաւ Գերեզմանի կարգը եւ հայր սուրբին մարմինը ամփոփուեցաւ «Զարեհեան» միաբանական յուշարձան-դամբարանին մէջ։
