Քաղաքական գործիչները պաշտօնական գետնի վրայ ինչ որ ալ ըսած ըլլան, անսպասելի պահուն յանկարծ կը յայտնուի խոստովանութիւններ փոխանակող յուշագրութիւններ, որոնք տարիներ վերջ ցնցիչ ազդեցութիւններ կրնան ունենալ։ Այդպէս եղաւ նախկին պետնախարար Ճավիթ Չաղլարի յուշագրութիւններու հրապարակումը։ Չաղլար տասնամեակներ անց խոստովանութեան մը ձեւաչափով կը ներկայացնէր Թուրքիոյ մօտ անցեալի շատ կարեւոր զարգացումները։ Անոնց մէջ կը տեսնենք թէ պետութիւնը կարիքներու դիմաց ինչպէս կը ոտնակոխէ ընդունուած բոլոր կարգն ու կանոնները եւ նոյնիսկ սահմանուած օրէնքները։ Իսկապէս ուշագրաւ էին յունաց նախկին Տիեզերական Պատրիարքի ընտրութեան վերաբերեալ տողերը։
Ճավիթ Չաղլար ամենայն անկեղծութեամբ կը պատմէր թէ օրուայ կառավարութիւնը ինչ եղանակներով միջամտած է պատրիարքի ընտրութեան եւ ինչպէս ոտնակոխած է այդ մասին իր սահմանումները եւ թրքական անցագիր շնորհած Աթենակորաս Սրբազանին։
«Այս մասին անձամբ լսած եմ նախկին Արտաքին Գործոց Նախարար Իհսան Սապրի Չաղլայանկիլի վկայութիւնը, Կիպրոսին Թրքական Բաժնի նախքին նախագահ Ռաուֆ Տենքթաշի ներկայութեամբ։ Չաղլայանկիլ քանի կը պատմէր, Տենքթաշի աչքերը ալ աւելի մեծ կը բացուէին զարմանքի պատճառաւ»։
Ճավիթ Չաղլար «Թ24» կայքէջի լրագրող Ճանսու Չաղլըպելին հպարտութեամբ կը պատմէ թէ ինք եղած է Հայաստան-Թուրքիա ցամաքային սահմանի փակման խորհրդատուն։
Ան տակաւին մանրամասնութիւններով կը պատմէ թէ նորանկախ Ատրպէյճանի մէջ ինչպէս իշխանափոխութիւն կատարած են այդ երկրի նախագահ Էլչիպէյի դէմ։
«Էպուլֆէյզ Էլչիպէյ ալքոլամոլ մըն էր։ Առաւօտուայ դէմ դուրս եկած էր իր իջեւանած պետական հիւրանոցէն եւ ապա անյայտ կորած Պոլսոյ փողոցներու վրայ։ Ոստիկանութիւնը խառնուեցաւ ու սկսան ամէն տեղ զինք փնտռել։ Վերջապէս գտանք Սկիւտար, Թաքսիի մը մէջ, որ գինովցած, հարբած, ու գնած էր։ Օրուայ վարչապետին համոզեցի թէ կարելի չէ իրմով շարունակել։ Այդպէս օրակարգի եկաւ Հայտար Ալիեւի անունը եւ շուտով ալ իշխանափոխութիւն կատարուեցաւ։ Էպուլֆէյզ Էլչիպէյ գահընկէց ըլլալէ ետք գնած իր ծննդավայր Նախիջեւանի Օրտուպատ (Գողթան) գաւառը, ու հոն ալ մահացաւ»։
Ճավիթ Չաղլար այս ցնցիչ յայտարարութիւններով հանդերձ կը հրաժարի թղթակից Ճանսու Չամլըպելի կարգ մը հարցումներուն պատասխանելէ, ըսելով թէ անոնք պետական գաղտնիքներ են եւ չի կրնար անոնց մասին խօսիլ։
Ճավիթ Չաղլարի հրապարակումները անգամ մը եւս մտածել կու տան թէ սովորական մարդկանց ընկալումին մէջ որոշ վեհութիւն վերագրուած պետական որոշումները ինչպիսի ազդակներով եւ ինչպիսի գործօններով կեանքի կը կոչուին։
Թուրքիոյ նոր ժամանակներու կարեւորագոյն փոթորիկներէն մէկը ծագած էր, երբ թրքական կործանիչներ հարուածեցին Ռուսական «ՍՈՒ-23» կործանիչ ինքնաթիռը։
«Երկու պետութիւններու միջեւ գոյացած ճգնաժամը լուծելու համար իսկոյն միջոցներ որոնեցի։ Նախկին Խորհրդային երկիրներէ բարեկամներուս միջնորդութեամբ ժամադրուեցայ Փութինի հետ եւ գտանք հաշտութեան եղանակները»։
Չաղլար եւս առաջարկներ ունի Ռուսական «Ս-400» հրթիռներու պատճառաւ ԱՄՆ-ի հետ գոյացած ճգնաժամը լուծելու համար։ Ան համոզուած է որ, Թուրքիա այդ հրթիռները կրնայ վաճառել երրորդ երկրի մը եւ ձերբազատուիլ ԱՄՆ-ի պատժամիջոցներէն։
Այս պահուն յիշենք թէ Չաղլար անուանի գործարար մըն է նաեւ եւ այդ դասակարգն ալ խնդիրները լուծելու համար կը դիմէ նման եղանակներու։