Ն.Ա.Տ. Սահակ Բ. Պատրիարք Հայրը 24 Փետրուար 2023, Ուրբաթ երեկոյեան, ընդունեց իսթանպուլահայ միութիւններու ներկայացուցիչները։ Հանդիպումին ներկայ էին Պատրիարքական Աթոռոյս Դիւանադպիր Հոգշ. Տ. Յովակիմ Աբղյ. Սերովբեան, Գաւազանակիր Արժ. Տ. Շիրվան Քհնյ. Միւրզեան, ինչպէս նաեւ Պատրիարքական Աթոռոյ Ընկերային Օժանդակութեան Յանձնախումբի ներկայացուցիչները։
Նորին Ամենապատուութեան հրաւէրով կայացած խորհրդակցական ժողովը բացուեցաւ մեր Հոգեւոր Պետին աղօթքով։
Ապա Պատրիարք Հայրը յայտնեց, որ փափաքած էր իսթանպուլահայ միութիւններու ներկայացուցիչներուն եւս տեղեկութիւն տալ երկրաշարժի աղէտի ու աղէտահարներու համար տարուած աշխատանքներու մասին։
Յանուն Ընկերային Օժանդակութեան Յանձնախումբի, խօսք տրուեցաւ նոյն յանձնախումբի ատենապետ Խաչիկ Ճանէլի, որ մանրամասն բացատրութիւններ տուաւ աղէտահարներու ի նպաստ կատարուած մարդասիրական աշխատանքներու մասին։
Ներկաներ յայտնեցին, որ իսթանպուլահայ միութիւններ եւս կը փափաքին պաշտօն ստանձնել օժանդակութեան մարդասիրական գործին մէջ եւ այս մէկը կը նկատեն իրենց պարտքը։
Յանուն միութիւններու խօսք առաւ Գէորգ Սիմքէշեան եւ ըսաւ թէ ամէն մարդ, իր կարողութեան համաձայն կու գայ իր ներդրումը ընելու աղէտեալներու օժանդակութեան գործին։ Իսթանպուլահայ միութիւններ ալ եկած են իրենց պատրաստակամութիւնը յայտնելու պաշտօն ստանձնելու համար եւ գոնէ մարդոյժով եւ այլ ձեւերով գործակցիլ այս սուրբ գործին։
Պատրիարքական Աթոռոյ Ընկերային Օժանդակութեան Յանձնախումբի անդամները յայտնեցին, որ մինչեւ այսօր, յատկապէս Իսկենտէրունի ու Վաքըֆգիւղի մեր համայնքներէն մեծ ու փոքր հարիւր յիսուն երկսեռ անդամներ քաղաքս եկած են ժամանակաւորապէս կեցութիւն հաստատելու եւ երկրաշարժի պատճառած արհաւիրքէն թօթափուելու համար։
Ներկաներ հարցումներով ու կարծիքի փոխանակումով առաջարկներ բերին աղէտահար ժողովուրդին զանազան ձեւերով օժանդակելու համար։
Ամեն. Ս. Պատրիարք Հայրը իր ուրախութիւնը յայտնեց սոյն հանդիպումին ու մասնակիցներու մարդասիրական սոյն գործին ցուցաբերած պատրաստակամութեան համար եւ օրհնեց բոլորը ու յաջողութիւն մաղթեց իրենց։
