Գեղանկարիչ Լեւոն Լաչիկեան կը պատրաստուի նոր ցուցահանդէսով մը ներկայանալ Իսթանպուլի արուեստասէրներուն կրկին անգամ նիւթ ունենալով այս քաղաքի ճարտարապետական յատկութիւնը։ Ան մօտ անցեալին այս առումով ունեցած էր նախափորձ մը, որ հետաքրքրութիւն գոյացուած էր հանդիսատեսի մօտ։ Լաչիկեան ունի նկարելու ուրոյն ոճ մը, որու շնորհիւ ան առանց մատնուելու գոյներու բազմութեան կը յաջողի նկարել այն ինչ որ ուրոյն է միայն արուեստագէտի հայեացքով։ Լաչիկեանի գործերէն դուրս կը բխայ հրաշալի գունագեղութիւն, որ շատ անգամ ապահովուած է միայն մէկ գոյնի տարբեր երանգներու օգտագործումով։
Իր նախորդ ցուցահանդէսին մէջ գոյնի համադրութիւնը կը դիտուէր սեւ ու սպիտակի սահմանումով։ Իսկ այս անգամ նոր ցուցահանդէսի համար ան փոխած է գոյներու ներդաշնակութիւնը շագանակագոյնի եռանգներէն օգտուելով։ Այս կաղապարին մէջ զարմանալի հարազատութիւնով մը կը ցոլանայ կղզիներու խորհրդանշան դարձած դափնեվարդերը, որոնք ստացած են իւրայատուկ կենդանութիւն։ Առայժմ ճշդուած չէ ցուցահանդէսի վայրը կամ թուականը, սակայն հաւանական է, որ ինչպէս նախորդ անգամ այս անգամ ալ Լաչիկեանի գործերը հանդիսատեսին ներկայանան Գնալը Կղզիի մէջ։ Մենք կը շնորհաւորենք Լեւոն Լաչիկեանի այս ձեռնարկը, քանի որ այժմէն արդէն ոգեւորուած ենք կրկին անգամ իր տաղանդը վայելելու առիթը տեսնելով։
