Մայիս ամսու վերջին օրերուն 29 եւ 30 Մայիսին Պէյրութի մէջ կը կայանայ «Եգիպտոսի, Սուտանի եւ Եթովպիոյ հայերը» վերնագրեալ գիտաժողով մը։ Պէյրութի Հայկազեան համալսարանի նախաձեռնութեամբ կազմակերպուած սոյն գիտաժողովին իրենց զեկոյցներով կը մասնակցին բազմաթիւ ակադեմականներ։ Այդ զեկոյցները կը քննարկեն տուեալ համայնքներու պատմական հսկայ անցեալը մերթ նիւթ ունենալով տպագրութեան եւ մամուլի աշխարհը, մերթ որբանոցներու կամ նման մարդասիրական հաստատութիւններու պատմութիւնը, մերթ ալ արաբախօս հայերու հիւսած գրականութիւնը։
Պատմական անցեալը ուսումնասիրող այդ զեկոյցներու կողքին կան նաեւ տուեալ երկիրներու եւ Հայաստանի մեր ժամանակներու միջպետական յարաբերութիւնները ուսումնասիրող բանախօսութիւններ։ Որպէս օրինակներ նշենք Հայկ Աւագեանի «Եգիպտոսի սինեմայի եւ թատրոնի հայ դերասանները. Ինքնութեան խնդիրներ», Տիգրան Ղանալանեանի «Հայերի արտագաղթը Եգիպտոսից 1950-70-ականներին», Վլատիմիր Պօղոսեանի «Սփիւռքահայութեան հետ մշակութային կապի կոմիտեն եւ եգիպտահայութիւնը (1964-90)»։
Հայկազեան համալսարանի հայկական սփիւռքի ուսումնասիրութեան կեդրոնի տնօրէն դոկտ. Անդրանիկ Տագեսեան շատ կարեւոր ներդրում ունեցած է այս ծաւալուն ծրագրին գործադրման մէջ։ Արդարեւ Հայկազեան համալսարանի նախագահ վերապատուելի Փոլ Հայտոսթեանի եւ Եգիպտոսի հայոց առաջնորդ Աշոտ եպիսկոպոս Մնացականեանի կողքին ինք է, որ կը կատարէ օրուան հանդիսաւոր բացումը։ Անշուշտ, որ նման բովանդակութեամբ գիտաժողովը խիստ շահեկան է բոլոր անոնց համար, որոնք հետաքրքրուած են հայոց սփիւռքի կազմութեան մանրամասնութիւններով։ Այս հանգրուանին կը մնայ յուսալ, թէ այս արդիւնաւէտ նախաձեռնութիւնը շուտափոյթ կերպով ունենայ նաեւ իր յուշամատեանը, ուր տեղադրուած կը գտնենք բոլոր այն զեկոյցները, որոնք արտասանուած պիտի ըլլան այդ օրերուն։
