Երեսփոխաններու անձեռնմխելիութիւնները վերացնելու առաջարկով պատրաստուած օրինագիծը իշխանութեան եւ անոր ձայնակցող ընդդիմադիրներու ջանքերով ընդունուած էր եւ պետութեան պաշտօնաթերթին մէջ հրատարակուած 8 Յունիս 2016-ին։ Այդ թուականէն ետք Խորհրդարանի 152 պատգամաւորներու համար ներկայացուեցաւ 799 դիմումնագիր։ Անոնցմէ մէկ մասը իսկոյն գործադրուեցան, որուն հետեւանքով ընդդիմադիր ՀՏՓ կուսակցութեան համանախագահներ Ֆիկեն Եիւքսեքտաղ, Սելահատտին Տեմիրթաշ, կուսակցութեան բանբեր Այհան Պիլկեն եւ այլ երեսփոխաններ իսկոյն բանտարկուեցան։ Այժմ անոնց վրայ կ՚աւելնայ տասը նոր մեղադրանք եւս, որոնք կը սպառնան ՀՏՓ եւ ՃՀՓ-ցի երեսփոխաններուն։ Այսպէս Հանրապետական Կուսակցութենէն Խորհրդարանի խմբակցութեան փոխանորդ Էօզկիւր Էօզել, Մերսինի երեսփոխան Ֆիքրի Սաղլար, Ատանայի երեսփոխան Էլիֆ Տողան Թիւրքմեն եւ Իսթանպուլի պատգամաւոր Պարըշ Եարքատաշի դէմ մէկական, իսկ Ժողովուրդներու Ժողովրդավարութեան Կուսակցութենէ Ատանայի երեսփոխան Մերալ Տանըշ Պեշթաշի դէմ երկու, Իսթանպուլի պատգամաւոր Կարօ Փայլան, Այնթապի պատգամաւոր Մահմուտ Թողրուլ, Շըրնաքի պատգամաւոր Ֆերհատ Էնճիւ եւ Պաթմանի պատգամաւոր Այշէ Աճար Պաշարանի դէմ ալ մէկական մեղադրանք ներկայացուած է։
Նշենք որ նախապէս իրենց դէմ մեղադրանք ներկայացուած եւ դատուած երեսփոխաններէն Ֆիկեն Եիւքսեքտաղ եւ Նուրսել Այտողան կորսնցուցին նաեւ իրենց պատգամաւորի իրաւունքը։
Թուրքիոյ մէջ ժողովրդավարութեան առումով ամենախրթին երեւոյթներէն մէկն է ընտրուած պատգամաւորներու դէմ գործադրուած այս անարդարութիւնը։ Էրտողանի կառավարութիւնը բոլոր առիթներով փառաբանած էր ժողովուրդի կամքը զայն յաճախ կոչելով «ազգային կամք», սակայն առանց վարանումի կ՚անտեսէ ընդդիմադիր երեսփոխաններուն զօրակցող բազմամիլիոն ընտրողներու կամքը։ Կարծես ահաբեկչութիւն կոչուածը կախարդական գաւազան մը ըլլայ իշխանութեան ձեռքին, որ ամէն առիթով շահագործէ իրեն հետ համակարծիք չեղողներու դէմ։
