ՈՒՅԿԱՐ ԿԻՒԼԹԷՔԻՆ
uygargultekin@agos.com.tr
Հարնդ Տինքի սպանութեան դատավարութեան մէջ հերթը հասած էր պետական պաշտօնեաներու դատավարութեան։ Սակայն այս մասին դատախազի պատրաստած ամբաստանագիրը զանազան պատճառաբանութիւններով ետ ղրկուած էր եւ հազիւ 9 Դեկտեմբերին պաշտօնապէս յանձնուեցաւ Իսթանպուլի 14-րդ Եղեռնադատ Ատեան։ Դատախազը իր պատրաստած ամբաստանագրին մէջ կը մեղադրէ զանազան պետական պաշտօնեաներ «պարտականութեան մէջ թերանալով մահուան պատճառ դարձած» ըլլալու յանցանքով։ Այսպէս բարձրաստիճան ոստիկաններ Էնկին Տինչ, Ահմէտ Իլհան Կիւլէր, Ճէլալէտտին Ճէրրահ, Ռէշատ Ալթայ եւ այլ 26 ամբաստանեալներ պիտի դատուին այս մեղադրանքով։ Դատախազ Կէօքալփ Քէօքչիւ վերջին պահուն ամբաստանագրին մէջ աւելցուց նաեւ պետական քննիչ Շիւքրիւ Եըլտըզի անունը։ Լսումներու համաձայն դատախազը բաւական խիստ ոճով պատասխանած է գլխաւոր դատախազին իր պատրաստած ամբաստանագիրը ետ վերադարձնելուն դէմ։
«Սապահ» թերթի լրատուութեան համաձայն, Քէօքչիւ գլխաւոր դատախազի փոխանորդին հետ համաձայնութիւն հաստատուած նիւթի մը պատճառաբանական գրութեան մէջ թերութիւն համարուելով վերադարձուելու պատճառ ցոյց տրուիլը անընդունելի գտած է։ Դատախազը համոզուած է որ թղթածրարին վերադարձուելուն ետին Ոստիկանութեան Լրաքաղութեան Բաժնի Պետ Էնկին Տինչի եւ անցեալին Իսթանպուլի Լրաքաղութեան Բաժնի Տնօրէն՝ Ահմէտ Իլհան Կիւլէրի թղթածրարէն դուրս հանուելուն մասին ճնշումները դեր ունեցած են։
Տինք ընտանիքի իրաւապաշտպան Հաքան Պաքըրճըօղլու իր կարգին բողոքած էր թղթածրարի վերադարձուելու որոշումին դէմ։ Պնդելով որ Գլխաւոր Դատախազութիւնը իրաւասու չէ թղթածրարը վերադարձնելու։ Պատրաստուած թղթածրարը մեղադրեալներու համար կը պահանջէ 25 տարուայ բանտարկութիւն։
