23Ապրիլ չորեքշաբթի օր, ժամը 12.49-ին Իսթանպուլ քաղաքը ուժգնօրէն ցնցուեցաւ ռիխթերեան չափանիշով 6,2 ուժգնութեամբ երկրաշարժով։ Շարժը տեւեց 10 երկվայրկեան, սակայն այդքանը բաւարար եղաւ որ բազմաթիւ քաղաքացիներ խուճապով դուրս գան իրենց բնակարաններէն կամ աշխատատեղերէն։
Երկրաշարժը պատճառ դարձաւ նաեւ յետագայ ցնցումներու, որոնց ամենամեծը ունէր 5,9 սաստկութիւն։ Մեծ երկրաշարժի մը ակնկալութիւնը արդէն իսկ անմիջական օրակարգի նիւթն է Պոլսոյ եւ շրջագայ տարածքի բնակչութեան համար։ Հաւանական երկրաշարժի մը ընթացքին կեանքի կորուստները նուազացնելու առումով կատարուած աշխատութիւնները այդ նպատակէն աւելի կը ծառայեն շինարարական ոլորտի աշխուժացման։
Այս վերջին երկրաշարժէն ետք ալ բնագէտներ ահազանգ կը հնչեցնեն եւ կ՚ընդգծեն թէ ի դէմ քարոզչական բնոյթով կատարուած խոստումներուն, քաղաքը արժանի կերպով պատրաստ չէ մեծ ցնցումներ արտադրող երկրաշարժի մը։
Երկրաշարժէն եւ յաջորդող ցնցումներէն ետք, երբ ժողովուրդը արդէն փութացած էր զբօսայգիներ եւ բաց տարածներ, Իսթանպուլի կուսակալը յայտարարեց թէ ցարդ փլուզման կամ կեանքի կորուստի վերաբերեալ լուր մը չէ հասած։ «Արտակարգ Իրավիճակներու Ծառայութիւնները կը շարունակեն ուսումնասիրութիւններուն եւ հասարակութեան խորհուրդ կու տանք թէ խուսափին ոչ կայուն շէնքեր մտնելէ, բայց առայժմ անպատեհ երեւոյթ մը գոյութիւն չունի» յաւելեց կուսակալը։
Վերջին տեղեկութիւններու համաձայն խուճապի մատնուելով տան լուսամուտներէն կամ պատշգամբներէն իրենք զիրենք վար նետած 155 անձեր գրանցուած են։ Կուսակալութիւնը նաեւ յայտնեց թէ քաղաքի բոլոր դպրոցները եւ ԲՈՒՀ-երը փակ պիտի մնան մինչեւ շաբաթավերջ։
