Թուրքիոյ մէջ ճազ երաժշտութեան նախապետներէն կը համարուի ալթ սաքսաֆոն եւ քլարնեթի մեծ վարպետ՝ Հրանդ Լուսիկեան։ Սրամտութիւններով յայտնի այս երաժիշտը այժմ կը ոգեկոչուի Պէյօղլուի Ճազի Փառատօնի ծիրէն ներս։
Այսպէս 16 Նոյեմբեր շաբաթ օր Սուրբ Երրորդութիւն Եկեղեցւոյ յարակից Նարեկեան սրահի մէջ հանրածանօթ երաժշտագէտ Սատեդդին Տավրան եւ բժիշկ Պարգեւ Պալըմեան յուշեր պիտի փոխանակեն այս մեծանուն ճազ երաժիշտի հետ իրենց ունեցած անձնական շփումներէն։
Ակադեմական Օրհան Թեքելիօղլու ըստանձնած է ժողովավարի պաշտօնը։ «Պէյօղլույէն Հրանդ Լուսիկեան մը անցաւ» խորագրեալ միջոցառման ծանօթագրութեան մէջ նշուած է հետեւեալը. «Եթէ Թուրքիոյ մէջ ճազ երաժշտութեան պատմութեան առումով աստղերու անուանացանկ մը պիտի պատարաստուի, այդ անուանացանկի առաջիններէն պիտի ըլլայ Հրանդ Լուսիկեանը»։
Ժամը 16.00-ի համար նախատեսուած միջոցառման կարելի է հետեւիլ նաեւ առցանց դրութիւնով՝ https://radarturkiye.com/event/beyoglundan-bir-hrant-lusigyan-gecti/m-7F2a7VQV2vL_F2-0s4eQ կայքի միջոցաւ։
Հրանդ Լուսիկեան ծնած էր 1917-ին, Պոլսոյ Ֆեներ թաղամասը։ Այդ տարիներուն պոլսահայ ընտանիքներէ ներս կը տիրէր երաժշտութեան հանդէպ յատուկ հակում։ Այդպիսին էր Լուսիկեաններու ընտանիքն ալ, ուր մայրը եւ քոյրը դաշնամուր, հայրն ու եղբայրն ալ ջութակ կը նուագէին։
Հրանդ դեռ եօթը տարեկան էր, երբ ինք ալ փորձեց ջութակ նուագել։ Սակայն այդ նուագարանին շուտով փոխարինեց սաքսաֆոնը, որ եղաւ նաեւ Հրանդ Լուսիկեանի անբաժան ընկերը։ 1941-ին կը ծանօթանայ Արթօ եւ Տիգրան Խաչատուրեան եղբայրներուն։ Իրենց կը միանայ հարուածային գործիքներով Վիքտոր Քոհենքօ եւ դաշնամուրով ալ Նիքօ։ «Սուինկ Ամաթէօր» կոչուած այս ճազպենտը կը նուագէ Մաչքա Փալասի մէջ եւ համերգ կը սարքէ Սարայ սինեմայի մէջ։
Աւելի ուշ նոր անուններու հետ նուագախումբեր կազմելով կը նուագէ քաղաքի կարեւոր ակումբներու եւ կապելաներու բեմերէն։ Մինչեւ 1980-ական տարեթիւեր «Փարք Օթել»ի, «Թոքաթլըեան»ի կամ «Հիլթոն»ի նման հիւրանոցներու մէջ կը հանդիպինք Հրանդ Լուսիկեանի, ճազ երաժշտութեան դասանականացած օրինակներու կատարումներով։
Կեանքի վերջին տարիները անցուց Սուրբ Փրկիչ Հիւանդանոցի ծերանոցի բաժինը եւ մահացաւ 1993-ին։
