Լրտեսութեան նախագիծը առկախուած

Թուրքիոյ քա­ղաքա­կան օրա­կար­գը վեր­ջերս ալե­կոծո­ւած է հա­սարա­կու­թեան մէջ «լրտե­սու­թեան օրէնք» կո­չու­մով ներ­կա­յացո­ւած նոր բա­նաձե­ւի մը պատ­ճա­ռով։

Իրա­կանու­թեան մէջ այս բա­նաձե­ւի նմա­նը վեր­ջերս ըն­դունո­ւած էր Վրաս­տա­նի Խորհրդա­րանի մէջ, բուռն հա­կազ­դե­ցու­թիւն գո­յաց­նե­լով Եւ­րո­մու­թեան շրջա­նակ­նե­րու մօտ։ Եւ­րո­խորհրդա­րանի նիս­տին բա­նաձե­ւի դէմ բո­ղոքի ար­շա­ւին մաս­նակցած էին Թուրքիան ներ­կա­յաց­նող ԱՔՓ-ական պատ­գա­մաւոր­ներն ալ։

Բա­նաձե­ւը «Պե­տու­թեան անվտան­գութեան կամ քա­ղաքա­կան ձեռքբե­րումնե­րու դէմ յան­ցա­գոր­ծութիւն» խո­րագի­րի ներ­քեւ կը բա­ցատ­րէ ոչ փաս­տա­ցի մե­ղադ­րանքներ, որոնք դիւ­րաւ կրնան մեկ­նա­բանո­ւին իբ­րեւ օտար երկրի մը կա­ռավա­րու­թեան սա­տարող արարք ըլ­լա­լով։

Յայտնի է թէ նման բա­նաձե­ւի մը վա­ւերա­ցու­մով ծանր սպառ­նա­լիք մը գո­յացած պի­տի ըլ­լայ գլխա­ւորու­թեամբ լրագ­րողնե­րու, հա­սարա­կական կազ­մա­կեր­պութիւննե­րու գոր­ծիչնե­րու, քա­ղաքա­կան վեր­լուծա­բան­նե­րու, ակա­դեմա­կան­նե­րու կամ կարճ խօս­քով միտ­քեր ար­ծարծող, կար­ծիքներ հրա­պարա­կող շատ լայն զան­գո­ւածի մը հա­մար։

Ընդդի­մադիր կու­սակցու­թիւննե­րը կ՚առար­կեն այս բա­նաձե­ւին դի­տել տա­լով որ նման օրէն­քի մը գոր­ծադրու­թիւնը ար­դէն իսկ քա­ղաքա­կանա­ցած դա­տական հա­մակար­գի ձեռ­քին չա­րաշա­հելու հա­մար հրա­շալի առիթ մը պի­տի դառ­նայ։

Ժո­ղովուրդա­հան­րա­պետա­կան կու­սակցու­թեան պատ­գա­մաւոր Սեզ­կին Թան­րը­քու­լու «Ակօս»ին տո­ւած բա­ցատ­րութիւննե­րուն մէջ նշեց թէ բա­նաձե­ւը ոչ յստակ եւ կա­մայա­կան մեկ­նա­բանու­թիւննե­րու յար­մար ոճով մը պատ­րաստո­ւած է։

Բո­լոր այս հա­կազ­դե­ցու­թիւննե­րէ ետք իշ­խա­նու­թեան շրջա­նակ­նե­րը որո­շած են Խորհրդա­րանէ ներս նա­խագ­ծի քննար­կումը առ­կա­խել եւ վե­րատե­սուած նոր տար­բե­րակով կրկին Խորհրդա­րանի օրա­կար­գին բե­րել։