Օրերս Մատենադարանի հին ձեռագրերու գիտահետազօտական ինստիտուտի 65-ամեայ յոբելեանին նուիրուած միջոցառումներու շարքը մեկնարկեց բացառիկ ցուցադրութիւնով մը՝ «Նուիրական անուններ. մատեաններու տունդարձը» խորագիրով։ Այս առթիւ ներկայացուեցան հազուագիւտ արխիւային նիւթեր, տարբեր ժամանակներուն Մատենադարանի նուիրաբերուած գիրքեր եւ ձեռագիրեր։ Միջոցառման ներկայ էին ԿԳՄՍ նախարար տիկին Ժաննա Անդրեասեանը, Մատենադարանի տնօրէն տիար Արա Խզմալեանը, մշակութային տարբեր հաստատութիւններու ներկայացուցիչներ, բարերարներ, նուիրատուներ եւ այլն։ Մատենադարանի տնօրէնի խօսքով՝ բարերաները յետայսու կազմելու են Մատենադարանի տեղեկատուական քաղաքականութեան առանցքը եւ յառաջիկային շատ անդրադարձներ կան նուիրական անուններուն։ Այս տարի նախատեսուած է յատուկ ցուցադրութիւն, որտեղ կը ներկայացուին վերջին մէկ տարուայ արժէքաւոր ձեռագրական համալրումները։
Ցուցահանդէսի նուիրատուներէն Միհրան Մինասեանը «Ակօս»ի թղթակցին տեղեկացուց, որ իր կողմէ նուիրաբերուած է արաբերէն, արաբատառ հայերէն ձեռագրեր, նաեւ փաստաթղթերու ճոխ հաւաքածոյ՝ իտալերէն, ֆրանսերէն եւ այլ լեզուներով։ Ան յաւելմամբ նշեց թէ արաբերէն փաստաթուղթերը կը ներկայացնեն 17-19-րդ դդ. նոտարական արձանագրութիւններ, որոնք առաւելապէս առնչուած են հալէպահայութեան հետ:
Օրը նշանաւորուեցաւ նաեւ մէկ այլ իրադարձութեամբ՝ երկար դեգերումէ ետք տուն վերադարձաւ Վասպուրականի մանրանկարչական դպրոցին պատկանող 15-րդ դարու եւս մէկ ձեռագիր, որ ընդօրինակուած է Բաղէշի Մզուք գիւղը Յովհաննէս Երէցի կողմէ։ Ձեռագիրը գնուած է մասնաւոր աճուրդէ մը, բարերար Վիգէն Պատալեանի կողմէ։ Ի դէպ այս գրչին պատկանող ձեռագիր մը եւս կայ Մատենադարանի մէջ։ Տիար Արա Խզմալեանի բնորոշմամբ՝ Մատենադարանի ձեռագիր հաւաքածոն արտացոլումն է մեր հաւաքական պատմութեան, որու հետքերն առկայ են ֆիզիկական որոշակիութեամբ։ Մատենադարան մուտք գործած ամէն մի ձեռագիր հերթական վաւերացումն է մեր նախնիներու սխրանքի, երաշխիքը հաւաքական յիշողութեան։ Ձեռագրերու նուիրաբերումը տարիներու հետ վերածուած է հայութեան գոյահաստատման իւրայատուկ ակտի, դարձած է հայրենիքի եւ սփիւռքի միասնականութեան հենք ու գրաւական։
Նուիրատուներու համար սահմանուած «Մատենադարանի բարերար» ոսկէ մետալն առաջին անգամ տրուեցաւ Պատալեաններու կրտսեր ներկայացուցչին՝ Ռոման Պատալեանին՝ ի նշան երախտագիտութեան։
«Ակօս»-ի թղթակցի հետ զրոյցի ընթացքին ԿԳՄՍ նախարար տիկին Ժաննա Անդրեասեանը, կարեւորելով օրուայ խորհուրդը, նշեց. «Մեզ համար առաջին հերթին զգացմունքային օր է, որովհետեւ ամէն անգամ, երբ մատեան կը վերադառնայ Մատենադարան, յատկապէս նոյն գրչի երկու մատեան տեղ կը գտնեն իրար կողք, կը մտածես՝ ինչ որ բան ուրեմն ճիշդ տեղն է, եւ այդ իմաստով սա ցոյց կու տայ շարունակականութիւնը, որովհետեւ եթէ այս օր համալրում կ՚ունենանք, այս կը նշանակէ, որ աշխատանքները կը շարունակուին, այս կը նշանակէ որ պետութեան ու մասնաւորի համատեղ ջանքը կը շարունակուի։ Այս ամէնը ցոյց կու տայ, որ Մատենադարանը մեծ ներուժ ունի համախմբելու»։
