Թուրքիոյ քաղաքական դաշտի էական բազում նիւթերու մէջ միակ ընդդիմադիր կուսակցութիւնն է Ժողովուրդներու Ժողովրդավարութեան Կուսակցութիւնը։ Այս կուսակցութիւնը իր այդ յատկութեան հետեւանքով հիմնադրութենէն այս կողմ կ՚ենթարկուի բազմաբնոյթ հալածանքներու։ Այժմ ան կը դիմագրաւէ արգիլման մարտահրաւէր մը։ Նոյն պատճառաւ կուսակցութիւնը վերջին ընտրութիւններուն մասնակցեցաւ Կանանչ Ձախ Կուսակցութիւն անունով։ Աւելի վերջ գումարած ընդհանուր ժողովով կուսակցութիւնը որդեգրեց Ժողովուրդներու Հաւասարութեան եւ Ժողովրդավարութեան Կուսակցութիւն անուանումը, որ կրճատուած էր «ՀԵՏԵՓ» ըլլալով։ Սակայն այս կրճատումին դէմ ալ առարկութիւններ եղան եւ վերջապէս այսօր կուսակցութիւնը որդեգրեց «ՏԵՄ» կրճատումը։
Այսօր Խորհրդարանի միակ քրիստոնեայ երեսփոխանն է այդ կուսակցութեան շարքերէն Մարտինի պատգամաւոր Ճորճ Ասլան։ Ան վերջերս Խորհրդարանի ամպիոնէն իր ունեցած ելոյթը աւարտելէ ետք, օրուայ ժողովավարէն խնդրեց յաւելեալ երկու վայրկեան, որպէսզի իր մայրենիով շնորհաւորէ Սուրբ Ծննդեան Տօնը։ Այդ օր Խորհրդարանի Ժողովավարն էր Սըրրը Սիւրէյյա Էօնտէր։ Ան սիրով ընդառաջեց այս պահանջին եւ ապա Ճորճ Ասլան սկսաւ ասորերէն նախադասութիւններով շնորհաւորել քրիստոնէից Սուրբ Ծննդեան Տօնը։
Իսկոյն լսուեցան բողոքի ձայներ, յատկապէս ազգայնական կուսակցութիւններու եւ մանաւանդ ալ «ԻՅԻ» կուսակցութեան շարքերէն։ «Երկրի պաշտօնական լեզուն թրքերէն է, այս ամպիոնէն միայն թրքերէնով կրնաք խօսիլ» կը պոռար պատգամաւոր Լիւթֆիւ Թիւրքքան։ Ուրիշներ եւս կը ձայնակցէին այդ պոռթկումին։ Այս բողոքներու վրայ Ճորճ Ասլան յիշեցուց, որ այս երկրի վրայ իրենց գոյութիւնը բազմահազար տարիներու պատմութիւն մը ունի եւ ընդամէնը հազար տարի է, որ հոս եկած ցեղի մը այս դիտողութիւնը անիմաստ է։ «Մենք ուրիշ մոլորակէ մը եկած չենք։ Այս մեր երկիրն է, մեր հայրենիքը եւ մենք պիտի յամառինք մեր երկրի վրայ մեր լեզուն գործածելու» ըսաւ Ճորճ Ասլան։
Մինչ այդ բողոքողները շփոթ կը յայտնեն ըսելով թէ «Ինչպէս վստահ կրնան ըլլալ, որ ան ծնունդ շնորհաւորեց եւ ուրիշ բան մը չըսաւ»։ Ապա իրենց թիրախ դարձուցին ժողովավար Սըրրը Սիւրէյյա Էօնտէրը, որ չէ միջամտած օտար լեզուով ելոյթի։ Այս յարձակումներուն դիմաց Սըրրը Սիւրէյյա Էօնտէր յիշեցուց, որ ինք նախապէս այս ամպիոնէն «Քուրան»ի հատուածներէն մէկը՝ «Պաքարա»ի բաժինը ընթերցած է։ «Այդ ժամանակ ալ բառ մը իսկ չէիք հասկցած, բայց չէիք առարկած ալ։ Որպէս ժողովավար նոյնիսկ գլուխս կտրէք ես արգելք չեմ ըլլար մէկու մը մայրենիովը խօսելուն»։
Այս խիստ ուշագրաւ բանավէճը մեծ ուշադրութեան արժանացաւ ընկերային ցանցերու վրայ, տեղի տալով թերուդէմ կարծիքներու։
