17Հոկտեմբեր երեքշաբթի երեկոյ հրթիռակոծուեցաւ «Մկրտչական» հիւանդանոցի հողատարածքը։ Հիւանդանոցի հողատարածքը կը պատկանի Երուսաղէմի Հայոց Պատրիարքութեան եւ այն վարձակալուած է 99 տարուան համար։
Զոհերու թիւը սարսափելի է եւ կարգ մը աղբիւրներ կը հաղորդեն, որ զոհերու թիւը կրնայ հասնիլ 1000-ի։
Կազայի հատուածին մէջ գտնուող հիւանդանոցին իսրայէլեան հարուածներէն ետք Թուրքիոյ նախագահ Ռեճէպ Թայէպ Էրտողանը կոչ ըրած է դադրեցնելու այդ «աննախադէպ վայրագութիւնը»։
Իսրայէլեան բանակը Կազայի հատուածին մէջ ՀԱՄԱՍ-ի աւելի քան 200 ռազմական կառոյց թիրախաւորած է։ Զինուած ուժերու մամուլի ծառայութեան տուեալով՝ հարուածներ հասցուած են զինամթերքի պահեստներու եւ դրամատան, որ կ'օգտագործուէր ահաբեկչական գործունէութեան ֆինանսաւորման համար:
Նշուած է, որ Իսրայէլի բանակը ոչնչացուցած է նաեւ չորս զինեալ, որոնք փորձած են երկրի տարածք ներխուժել Լիբանանէն։ Կը շարունակուին օդային հարուածները Լիբանանի մէջ գտնուող «Հըզպալլա»ի կառոյցներուն:
Հակամարտութեան սրման պատճառով զոհերու թիւը ժամ առժամ կ'աճի: Կազայի հատուածին մէջ իսրայէլեան հարուածներու հետեւանքով զոհուած է աւելի քան 3500, վիրաւորուած է 10 հազարէն աւելի մարդ, այդ շարքին՝ հարիւրաւոր երեխաներ։ Իսրայէլը յայտնած է 1500-է աւելի զոհի մասին։
ՀԱՄԱՍ-ի «Քասսամ» խմբաւորումը յայտարարած է, որ գերիներու թիւը կը հասնի 250-ի, սակայն իսրայէլեան հարուածներու պատճառով 22 գերի զոհուած է: Խմբաւորումը խոստացած է ազատել օտարերկրեայ քաղաքացիները, երբ հանգամանքները թոյլ տան։
ՀԱՄԱՍ շարժումն ալ յայտնած է, որ մտադիր է Իսրայէլի հարաւէն գերեվարուած պատանդները փոխանակել իսրայէլեան բանտերու մէջ պահուող 6 հազար պաղեստինցիի հետ։
Իսկ Հայաստանի կառավարութեան կողմէ կազմակերպուած Թել Աւիւ-Երեւան յատուկ թռիչքով, Հայաստանի քաղաքացիներ եւ անոնց ընտանիքի անդամները 16 Հոկտեմբեր երկուշաբթի օր հասան Հայաստան:
Հայաստանի արտաքին գործոց նախարարութիւնը կը տեղեկացնէ, որ Իսրայէլէն Հայաստան տեղափոխուած են «149 Հայաստանի քաղաքացիներ եւ ազգութեամբ հայեր»:
Իսրայէլի Հայֆա քաղաքի եւ հիւսիսային շրջաններու հոգեւոր հովիւ Տիրայր քահանայ Յովակիմեան կը յայտնէ, որ իր ընտանիքը բերած է հայրենիք եւ մտադիր է վերադառնալ Իսրայէլ՝ հոգեւոր իր ծառայութիւնը շարունակելու համար:
«Ընտանիքիս եմ բերել: Նրանք կը մնան որոշ ժամանակ, մինչեւ հանդարտուի, բայց ես ծառայութեան մէջ եմ: Կարճ ժամանակահատուածում պիտի վերադառնամ, որպէսզի համայնքում լինեմ», ըսաւ հոգեւորականը:
Հայֆա քաղաքէն դստեր եւ նորածին թոռնիկին հետ հայրենիք ժամանած Նայիրա Առաքելեան նշեց, որ զաւակներուն եւ թոռնիկներուն կեանքին ապահովութեամբ մտահոգ կ՛ապրէր Իսրայէլի մէջ: «Շնորհակալութիւն եմ ուզում յայտնել Հայաստանի կառավարութեանը աջակցութիւն ցուցաբերելու եւ Իսրայէլից յատուկ թռիչքը կազմակերպելու համար», աւելցուց ան։
