Ազգային ժողովը 60 թեր, 22 դէմ քուէներով վաւերացուց Հռոմի կանոնադրութեան օրէնքի նախագիծը։ 7 օրեայ ժամկէտի մը ընթացքին, Ազգային ժողովը նախագիծը պիտի ուղարկէ նախագահին. ստորագրութեան համար։
Նախքան քուէարկութիւնը, ընդդիմադիր «Հայաստան» եւ «Պատիւ Ունեմ» խմբակցութիւնները յայտարարեցին, որ դէմ պիտի քուէարկեն նախագիծին։
Հայաստանի Ազգային ժողովին կողմէ Հռոմի սահմանադրութեան վաւերացումէն ժամեր ետք, Քրեմլինը յայտարարեց, որ ասիկա ճիշդ քայլ չէ երկկողմ յարաբերութիւններու դիտանկիւնէն։
Նախորդող օրերուն, Ռուսիոյ արտաքին գործոց նախարարութիւնը յայտնած էր, որ տեղեակ պահած է Երեւանը, թէ հայկական կողմի այս քայլը անընդունելի է, մանաւանդ երբ միջազգային դատարանը Ռուսիոյ բարձրագոյն ղեկավարութեան «ձերբակալման հրաման» տուած է։ Հակառակ մասնագէտներու պնդումին, որ Հայաստան պէտք է ձերբակալէ Փութինը՝ Երեւան այցելելու պարագային, Հայաստանի իշխանութեան ներկայացուցիչները բազմիցս վստահեցուցին, որ Երեւան այդպիսի մտադրութիւն չունի։
Երեքշաբթի, 3 Հոկտեմբերին, խորհրդարանի քուէարկութեան արձագանգեց նաեւ Ռուսիոյ Տումայի նախագահ Վեաչեսլաւ Վոլոտին։ «Թելեկրամ»ի իր ալիքին մէջ գրելով, թէ այս որոշումը հարցեր պիտի ստեղծէ առաջին հերթին Հայաստանի եւ անոր քաղաքացիներուն համար։ Ան յաւելեալ մանրամասնութիւն չտուաւ։ «Ասիկա չմտածուած, ռազմավարական առումով ոչ-ճիշդ որոշում է։ Որեւէ որոշում եւ ամէն ինչ կարելի է բացատրել, բայց անոնք, որոնք տուին այս որոշումը, պէտք է պատասխանեն, թէ ինչո՛ւ», գրեց ան։
«Ազատութիւն»ը կը տեղեկացնէ, թէ տակաւին յստակ չէ, որ ի՞նչ պատասխան քայլերու պիտի դիմէ Մոսկուա, սակայն աւելի կանուխ Քրեմլինի բանբերը ակնարկեց, թէ Հայաստան տնտեսական առումով մեծապէս կախեալ է Ռուսիայէն՝ յիշեցնելով, որ այսօր Մոսկուան է, որ Երեւանին կազ կը վաճառէ շուկայէն ցած գինով։
Այս բոլորին լոյսին տակ, հայաստանցի գործարարները արդէն կ՛ահազանգեն, թէ դժուարութիւններ ունին։ Վերին Լարսի մէջ, ուր հայկական քոնեաքով բեռցուած շուրջ 60 բեռնատարներ կանգնած՝ կը սպասեն ռուսական կողմի ստուգումներու աւարտին.
Ամէն պարագայի, Մոսկուա թէ՛ 3 Հոկտեմբերին եւ թէ նախորդ օրերուն, անդրադառնալով «Ռուսիոյ նկատմամբ ոչ-բարեկամական քայլերուն»՝ շեշտեց, թէ յոյս ունի, որ Հայաստան պիտի շարունակէ մնալ Ռուսիոյ դաշնակիցը։
