Պաշտօնական այցելութեամբ Հայաստան գտնուող Ֆրանսայի Եւրոպայի եւ արտաքին գործոց նախարար Քաթրին Քոլոնա արձագանգեց Հայաստանի Խորհրդարանի Հռոմի կանոնադրութիւնը վաւերացումին։ Ան նկատել տուաւ, որ այսպիսով Հայաստան պիտի դառնայ Միջազգային քրէական դատարանի մասնակից պետութիւն։ Ըստ նախարարին «անպատժելիութեան դէմ պայքարը խաղաղութեան եւ կայունութեան պայմաններէն է»։
Քաթրին Քոլոնա յայտնեց, որ Ֆրանսա իր համաձայնութիւնը տուաւ Հայաստանի հետ կնքելու ապագայ համաձայնագիր մը, որ կարելիութիւն պիտի տայ ռազմական սարքաւորումներ տրամադրել Հայաստանին՝ իր պաշտպանութիւնը ապահովելու համար։
Ան դիտել տուաւ, որ այս բնագաւառին մէջ երկու կողմէ ալ շատ լուրջ պատասխանատուութեամբ կը գործեն, որպէսզի ցնցումներ չյառաջանան։ «Մենք կը գիտակցինք, որ Հայաստանի կողքին կայ այնպիսի դրացի երկիր մը, որ անընդհատ թշնամական գործողութիւններ կը կատարէ», յայտնեց Քոլոնա։
Քոլոնա նաեւ խօսեցաւ Արցախի մասին՝ դիտել տալով, որ անոր բնակիչ հայերը ինքնակամ չհեռացան իրենց տուներէն, այլ եղածը բռնի տեղահանութիւն էր. Տեղի ունեցածը միջազգային իրաւունքի կոպտագոյն խախտում, իսկական ոճիր է։
Քոլոնան շեշտեց, որ այս փաստին յստակ գնահատական տալը կարեւոր է, եւ աւելցուց, որ այդ սուտը ոչ ոք կը մոլորեցնէ.
«Մարդասիրական այս սարսափելի աղէտի լոյսին տակ, Ֆրանսա 12.5 միլիոն եուրոյի օգնութիւն յատկացուց Հայաստանին, որ պիտի տրամադրուի բռնի տեղահանուածներուն համար արժանապատիւ պայմաններու ապահովման։ Ես կը խոստանամ, որ այդ օգնութիւնը ըլլայ շարունակական եւ դարձեալ տրամադրուի, եթէ պէտք ըլլայ», ըսաւ Քոլոնա։
Ան նաեւ տեղեկացուց, որ պաշտօնական դիմում կատարած է Եւրոպական Միութեան ներկայացուցիչ Ժոզեփ Պորելին։ Հայաստանի մէջ դիտորդական առաքելութիւնը ընդլայնելու, ինչպէս նաեւ առաքելութեան յանձնառութիւնը հզօրացնելու համար, որպէսզի կարենայ առաւել օգտակար ըլլալ Հայաստանին։
