ՏՈՂԱՆ ԷՕԶԿԻՒՏԵՆ
Հայրս իբրեւ երկաթուղիի աշխատող, կարող չէր իմ ուսման ծախսերը դիմագրաւելու։ Ստիպուած էի աշխատելու։ Ուղիղ 71 տարի առաջ, 9 Սեպտեմբեր 1952 թուականին աշխատանքի լծուեցայ Թուրքիոյ մէջ «օֆսեթ» դրութեամբ տպագրուող առաջին օրաթերթի՝ «Եգէականի արեւ»ի (Ege Güneşi) անձնակազմին՝ իբրեւ սթենոկրաֆ գրաշար։
1953-ի սկիզբէն Զմիւռնիոյ իշխող Տեմոքրաթ Կուսակցութեան ընդդիմադիր «Սապահ Փոստասը» թերթի մէջ մինչեւ 1962 գրաշարութենէ թղթակցութեան, սիւնակագիր կամ հրատարակութեան տնօրէնի նման զանազան պարտականութիւններ ստանձնեցի։ Նաեւ աշխատակցեցայ Պոլսոյ «Միլլիյէթ» եւ «Էօնճիւ» թերթերուն, իբրեւ Եգէական շրջանի ներկայացուցիչ։
Նոյն շրջանին մամլոյ աշխատողներու իրաւունքները պաշտպանելու համար «Զմիւռնիոյ լրագրողներու արհմիութիւն» եւ «Թուրքիոյ լրագրողութեան արհմիութիւններու Ֆետերացիա»ի, մամլոյ ազատութիւնը պաշտպանելու համար «Զմիւռնիոյ լրագրողներու միութեան», «Մամլոյ պատուոյ դիւան»ի մէջ պաշտօններ կատարեցի։ Իսկ քաղաքական գետնի վրայ պաշտօնավարեցի Թուրքիոյ Բանուոր Կուսակցութեան վարչութեան շարքերէն ներս։
1963 թուականէն սկսեալ, ընդառաջելով կուսակցութեան նախագահ Մեհմետ Ալի Այպարի ցանկութեան, տեղափոխուեցայ Իսթանպուլ։ Այստեղ ստանձնեցի Թուրքիոյ Բանուոր Կուսակցութեան գիտութեան եւ ուսումնասիրութեան խորհուրդի եւ կերդոնական խորհուրդի մէջ պատասխանատուութիւն ստանձնել։ Աշխատակցեցայ «Կեճէ Փոստասը» եւ «Աքշամ» թերթերու խմբագրապետի կոչումով։
Ինճի Թուղսաւուլի հետ «Աքշամ» թերթի շրջանակներէն սկսող կեանքի ու պայքարի միասնութիւնը յարատեւ եղաւ մինչեւ օրս։ 1967-ին Եաշար Քեմալ եւ Ֆեթհի Նալճըի մասնակցութեամբ հիմնած, ապա յեղափոխական երիտասարդ առաջնորդներու մասնակցութեամբ կեանքի կոչած «Անդ» պարբերականը եւ «Անդ» հրատարակչութիւնը շարունակեցինք մինչեւ 12 Մարտ 1971 թուականի զինուորական հարուածը։
«Անդ» պարբերականը երբ արգիլուեցաւ զինուորական իշխանութեան կողմէ, ինծի եւ Ինճիին դէմ յարուցուեցաւ բաւական ծանր բանտարկութեան պատիժ պահանջող դատական գործողութիւն մը։ Այդ պայմաններու տակ 1971-ին ստիպուած եղանք ապօրէն միջոցներով երկրէն հեռանալու։
Մեր աւելի քան 50 տարիներու հասնող տարագրութեան շրջանին «Տեմոքրաթական դիմադրութեան շարժում», «Ժողովրդավարութեան համար միութիւն», «Ինֆօ Թիւրք» եւ «Արեւի աշխատանոց» անուն կազմակերպութիւններու հիմնադիրներ դարձանք։
1974-էն այս կողմ համաշխարհային հասարակութիւնը Թուրքիոյ եւ գաղթականներու մասին իրազեկելու համար զանազան լեզուներով տեղեկագիրներ եւ գիրքեր հրատարակած «Ինֆօ Թուրք» լրատու գործակալութիւնը կը վարենք։
HYPERLINK “https://www.info-turk.be/homepage.htm” \t “_blank” https://www.info-turk.be/homepage.htm
Ներկայիս մեր ժամանակի մեծ մասը կը վատնենք յիսնամեակը բոլորած մեր տարագրութեան պարբերական եւ այլ հրատարակութիւններու արխիւային դասաւորումին։
Այս եւ տարիքի բերմամբ յայտնուած այլ դժուարութիւններով հանդերձ մեր ընթերցողներուն եւ բարեկամներուն կը խոստանաք անխափան շարունակել մեր պայքարը։
Բազում տարիներու, միասնաբար...
