Գաւառի գրականութեան մերօրեայ կարեւոր անուններէն արձակագիր Մկրտիչ Մարկոսեան կը յիշատակուի Մեծ կղզիի մէջ։ Բացի իր ծննդավայր Տիգրանակերտի վկայութիւններէն, «Էվրենսել» օրաթերթի մէջ գրած յօդուածներով ալ ընթերցողներու լայն զանգուած մը ապահոված Մարկոսեան մահացած էր 2 Ապրիլ 2022 թուականին։
Իշխանաց կղզիներու քաղաքապետարանի, Կղզիաց խորհուրդի եւ Կղզիաց թանգարանի աջակցութեամբ 18 Օգոստոս ուրբաթ երեկոյ ժամը 19.30-ին Չելիք Կիւլերսոյի անուան մշակոյթի կեդրոնին մէջ կայանալիք միջոցառման ատենախօսներն են «Ակօս»ի հայերէն էջերու խմբագիր Բագրատ Էսդուգեան եւ «Կաւուր Մահալլէսի» անուն վաւերագրական ֆիլմի հեղինակ Եուսուֆ Պայսիւլեն, իսկ ժողովավարի պաշտօն կը ստանձնէ հանրածանօթ լրագրող Օրալ Չալըշլար։
