ՄԱՐԳԱՐ ՉԱԼԸՔԵԱՆ
Կըտա Իշ արհմիութեան եւ Մանոս հրատարակչատան համատեղ ջանքերով կազմակերպուած գրական մրցանակի յաղթողները ճշդուեցան։
Անուանի բանաստեղծուհին մահացած էր 7 Հեկտեմբեր 2015 թուին։ Այս տարի եօթերորդ անգամ կազմակերպուած մրցոյթը ընթացաւ գրական երկու սեռերու՝ բանաստեղծութեան եւ արձակ պատմուածքի ճիւղերով։
Այս տարի բանաստեղծական մրցումի յաղթողը հռչակուեցաւ Էմին Քայա։ Ան մրցման մասնակցած էր «Համրացած օտարականը» անուն բանաստեղծական հաւաքածոյով։ Բանաստեղծական մրցումի մէջ Տողու Քաշկա ալ դատակազմի յատուկ մրցանակին արժանացաւ «Արեւը միայն գորտերուն համար տանջանք է» անուն թղթածրարով։
Բանաստեղծական դատակազմին մաս կը կազմէին Օրհան Ալքայա, Նալան Չելիք, Ա. Հիճրի Իզկէօրեն, Կիւլճէ Պաշէր եւ Պեթիւլ Տիւնտէր։ Այս վերջինը մրցանակի արժեւորման բացատրութիւնը ըրաւ հետեւեալ տողերով. «2023-ի Շեննուր Սեզերի անուան մրցանակին արժանացած Էմին Քայա ժամանակաից չափածոյ գրականութեան կարեւոր անուններէն մէկը ըլլալու տպաւորութիւնը կը թողու։ Ան աշխատանքին ու իրարօգնութեան տրամադրութիւնները նրբերանգ եղանակով վերածած է ապստամբութեան մը։ Այս ընելու պահուն լեզուի այրիշխան տրամադրութիւնը գիտակցօրէն մերժած է, որու հետեւանքով արժանացած է դատակազմի մեծամասնութեան գնահատանքին»։
Պատմուածքի բաժնին այս տարի առաջադրուած էին 17 թղթածրարներ։ Ատնան Էօզեալչընէր, Այշեկիւլ Թեզէօրեն, Բագրատ Էսդուգեան, Էյլեմ Աթա Կիւլեչ եւ Թունչ Քուրտէն բաղակացող պատմուածքի դատակազմը այս տարուան յատուկ ըլլալով նշանակեց երկու յաղթողներ։ Բացի Սեննուր Սեզերի մրցանակին արժանացող Հաթիճէ Սապահի «Ես ռոպոթ չեմ» անուն թղթածրարէն, Համտի Թոփճուօղլուին ալ Լիմպուրկեան հէքեաթներ անուն թղթածրարը արժանացաւ նախորդ տարիներու դատակազմերու բազմամեայ անդամ Ահմետ Թուլկարի անուան շնորհուած մրցանակին։
Դատակազմի անդամներէն Էյլեմ Աթա Կիւլեչ, Հաթիճէ Սապահի ընտրութիւնը բնութագրեց թղթածրարի ամբողջութեան մէջ զգացուած ստեղծագործ երեւակայութեան, դէպքերու հիւսուածքի եւ յետադարձ ակնարկներու կերպարներուն ընտանեկան անցեալին յստակ ցոլացում մը պատճառելուն, շրջապատի պայմաններուն անհատի ինքնութեան ձեւաւորման մէջ գործած ազդեցութեան յաջող ցոլացումը պատճառաբանելով։
Իսկ Թունչ Քուրտ, Համտի Թոփչուօղլուի «Լիմպուրկեան հէքեաթներ» անուն թղթածրարը նկարագրեց բանուոր դասակարգի կեանքի ծանր պայմաններուն տակ տքնող անհատներուն պանդխտութեան պայմանները եւ օտարութեան հոգեբանութիւնը դիմագրաւելու պայքարը լաւագոյնս նկարագրելուն բերմամբ։
Նշենք որ Սեննուր Սեզերի գրական մրցանակը իբրեւ խորագիր որդեգրած է «Աշխատանքի եւ դիմադրութեան գրականութիւնը» ենթախորագիրը։
