Ֆրանսայի նախագահ Էմանուէլ Մաքրոն յայտարարեց, որ Ֆրանսական դիմադրական շարժումի հերոսներէն Միսաք Մանուշեանի աճիւնը յառաջիկայ տարի պիտի փոխադրուի անուանի անձնաւորութիւններու թաղուած պանթէոն։
Էլիզէի պալատէն կատարուած յայտարարութեան մէջ Մաքրոն նշած է, թէ Մանուշեան իբրեւ հայ բանաստեղծ համայնավար եւ դիմադրական շարժումի գործիչ երկրի համաշխարհային արժէքներէն մէկն է, որու անձին մէջ կը մարմնաւորուի ազատութեան, հաւասարութեան եւ եղբայրութեան վեհագոյն խորհուրդները։
Մաքրոն նաեւ յայտարարած է, որ Մանուշեանի հետ միասին ֆրանսական դիմադրութեան ութը հերոսներու աճիւնները եւս 21 Փետրուար 2024-ին պիտի փոխադրուին պանթէոն։
Ընտանիքի անդամներու խնդրանքով Մանուշեանի կողակիցը Մելինէի աճիւնը եւս պիտի փոխադրուի նոյն վայրը։
Միսաք Մանուշեան ծնած էր 1906 թուին Ատըեաման։ Ցեղասպանութեան ընթացքին բացի կրտսեր եղբօր Կարապետէն, զոհուած էին իր ընտանիքի բոլոր անդամները։
Որոշ ժամանակ ընտանեկան ծանօթութիւն ունեցած քիւրտ ընտանիքի մը խնամքին ապաւինած երկու եղբայրներ պատերազմի աւարտին ուղարկուեցան սուրիական տիրապետութեան տակ գտնուող որբանոց մը։ Միսաք 1925-ին հայրենազուրկ գաղթական մը ըլլալով Ֆրանսա հասաւ։ Անդամակցեցաւ Ֆրանսայի կոմունիստ կուսակցութեան։ 1943-ին ալ մասնակցեցաւ Երկրորդ համաշխարհային պատերազմի ընթացքին Ֆրանսան գրաւած Գերմանական ֆաշիզմի դէմ դիմադրական շարժումին։ Գլխաւորեց բոլորն ալ իր նման գաղթականներէ բաղկացող ջոկատը։ Այդ ջոկատին անդամակցած էին նաեւ բազմաթիւ հրեաներ։
1944-ին Մանուշեանի հետ միասին ձերբակալուած 23 յեղափոխականներ գնդակահարուեցան նացիներու կողմէ։
Նացիներ այդ մահապատիժը իրենց հաշուոյն յաղթանակ համարելով որմազդներ պատրաստեցին ու փակցուցին երկրի բոլոր քաղաքներու պատերուն։ Որմազդիներու վրայ գրուած էր «Յանցագործներու բանակ»։ Յաջորդ առաւօտ նացիներու այդ քարոզչութիւնը օդին մէջ ցնդած մնաց, քանի որ ամենուէք գրուած էր «Ֆրանսայի համար զոհուեցան»։
Այս հասկացողութիւնը մինչեւ օրս կը տիրէ ֆրանսական հասարակութեան մօտ, քանի որ բոլորովին տարբեր գաղափարական մերձեցում ունեցող քաղաքական գործիչներն իսկ չեն վարանիր Մանուշեանի եւ իր ընկերներու հանդէպ յարգանք ցուցաբերելէ։
Միսաք Մանուշեանի կողակցին՝ Մելինէի յուշերու «Արաս» հրատարակչատան կողմէ հրապարակումով Մանուշեանի անունը ծանօթ դարձաւ նաեւ Թուրքիոյ ձախակողմեան շրջանակներէ ներս եւ այդ միջավայրի մէջ ալ ան կը դիտուի իբրեւ նացիզմի դէմ համաշխարհային դիմադրութեան առաջնատար կերպար մը ըլլալով։
