Նախորդ կիրակի տեղի ունեցաւ Թուրքիոյ նախագահական ընտրութեան երկրորդ փուլը։ Թուրքիոյ գործող նախագահ Ռեճեփ Թայիփ Էրտողան 14 Մայիսին տեղի ունեցած նախագահական ընտրութեան առաջին փուլի ընթացքին ապահոված էր քուէներու 49,5 առ հարիւրը, իսկ անոր մրցակիցը՝ Ժողովրդահանրապետական կուսակցութեան նախագահ Քեմալ Քըլըչտարօղլուն՝ քուէներուն 44,9 առ հարիւրը։
85 միլիոն բնակչութիւն ունեցող երկիրին մէջ նախագահական ընտրութեան մասնակցեցան աւելի քան 60 միլիոն քաղաքացիներ։ Ընտրութիւնը նշանակալից էր, ոչ միայն, երկրի յաջորդ ղեկավարը ճշդելու իմաստով, այլ նաեւ վարչական դրութիւնը ստուգելու իմաստով։ Թուրքիա այժմ մատնուած է տնտեսական ճգնաժամի, որուն հետեւանքը կը ցոլանայ ապրուստի դժուարութեամբ, մեծ սղաճի ու ազգային դրամանիշի արժեզրկման երեւոյթներով։ Ընտրութիւնը նաեւ պիտի ճշդէ Թուրքիոյ արտաքին քաղաքականութեան կողմնորոշումը։
Էրտողան եւ Քըլըչտարօղլու նոյն պահուն քուէարկեցին Պոլսոյ եւ Անգարայի ընտրական տեղամասերուն մէջ։ Գործող նախագահը քուէարկելէ ետք յայտնեց. «Հեզասահ ընտրական հոլովոյթ մը եւ արդիւնքներու արագ յայտարարում կը նախատեսենք։ Թուրքիան փաստեց, թէ որքան կառչած է ժողովրդավարութեան» ըսաւ ան։
Քըլըչտարօղլու իր կարգին յայտնեց. «Բոլոր քաղաքացիներուն կոչ կ’ուղղեմ՝ քուէատուփեր ուղղուելու եւ պաշտպանելու իրենց քուէները, որովհետեւ ընտրութիւնը տեղի կ’ունենայ դժուար պայմաններու մէջ»։ «Թուրքերուն կոչ կ’ուղղեմ՝ մենատիրական վարչակարգէն ձերբազատուելու համար քուէարկելու» ըսաւ ան։
Նախքան այդ, Թուրքիոյ Ընտրական բարձրագոյն խորհուրդի նախագահ Ահմեթ Եանար յայտարարեց. «Նախագահական ընտրութեան արդիւնքի յայտարարումը շատ պիտի չ’ուշանայ ինչպէս պատահեցաւ առաջին փուլին»`աւելցնելով, որ երկրորդ փուլին մասնակցութեան համեմատութիւնը եւս բարձր է։
Էրտողան քուէարկութեան աւարտէն ու քուէներու հաշուարկը սկսելէն ետք կոչ ուղղեց՝ մինչեւ վերջնական արդիւնքի յայտարարումը պաշտպանելու քուէատուփերը։ Ժողովրդահանրապետական կուսակցութիւնը իր կարգին կոչ ուղղեց՝ մինչեւ ժամը 7 սպասելու կուսակցութեան մամլոյ ասուլիսին, եւ ատկէ առաջ կուսակցութեան կողմէ չհրապարակուած որեւէ արդիւնք անտեսելու։ Կուսակցութեան բանբերը նաեւ յայտարարեց. «Պիտի պաշտպանենք մեր ժողովուրդի կամքը եւ յաղթանակ արձանագրենք»։
Նախագահական ընտրութեան մասնակցութեան համեմատութիւնը 83,99 առ հարիւր էր։
Էրտողան Պոլսոյ մէջ իր համակիրներուն առջեւ ճառ մը արտասանելով յայտարարեց իր յաղթանակը. «Մեր ժողովուրդը մեզի ժողովրդավարութեան տօն ապրեցուց»։ Ան ըսաւ, որ ընտրական հոլովոյթը ընթացած է «առողջ եւ հանդարտ կերպով»։
«Այսօր Թուրքիան յաղթեց, Ազրպէյճանը յաղթեց, Ղարաբաղը յաղթեց», յայտարարեց հինգ տարուայ նոր նստաշրջանի մը համար Թուրքիոյ նախագահ վերընտրուած Էրտողան։
Քըլըչտարօղլու իր համակիրներուն առջեւ պաշտօնական ու հակիրճ խօսք մը արտասանելով յայտարարեց. «Ընտրութիւննները արդար չէին, եւ միւս թեկնածուն պետութեան կարելիութիւններէն օգտուեցաւ։ Կը մաղթեմ, որ մեր երկրին մէջ ժողովրդավարութեան հաստատման համար մեր պայքարին մէջ մեզի աջակցիք»։
Բազմաթիւ միջազգային ղեկավարներ շնորհաւորեցին Էրտողանը նախագահ վերընտրուելուն համար։ Ռուսիոյ նախագահ Վլատիմիր Փութին Էրտողանը «սիրելի բարեկամ» կոչելով շնորհաւորեց անոր արձանագրած յաղթանակը։
Միացեալ Նահանգներու նախագահ Ճօ Պայտըն իր կարգին շնորհաւորելով Էրտողանը թուիթըրեան էջին վրայ գրեց. «Ես կ’ակնկալեմ շարունակել, իբրեւ ՆԱԹՕ-ի դաշնակիցներ, երկկողմ խնդիրներու եւ հասարակաց համաշխարհային մարտահրաւէրներու շուրջ միացեալ աշխատանքը»։
ՀՀ Վարչապետ Նիկոլ Փաշինեան ալ «Թուիթըրեան» գրառումով մը շնորհաւորեց նախագահի վերընտրութիւնը։ «Սպասում եմ մեր համատեղ աշխատանքի շարունակութեանը մեր երկրների միջեւ յարաբերութիւնների լիարժէք կարգաւորման համար», գրած է ան։
