19Ապրիլ Չորեքշաբթի, Իսթանպուլի եւ Թուրքիոյ Կաթողիկէ Հայոց Վիճակաւոր Արհի. Տ. Լեւոն Արք. Զէքիեան, Պեյօղլուի քաղաքապետ Հայտար Ալի Եըլտըզի հրաւէրով, Քաղաքապետարանի կողմէ Անթաքիոյ մէջ կազմակերպուած Իֆթարին մասնակցելու համար, համայնքային Կրօնապետներու, Իսթանպուլ պաշտօնավարող դիւանագիտական մարմնի անդամներու եւ կառավարական պաշտօնեաներու մասնակցութեամբ բաղկացող ստուար խումբի մը հետ դէպի Հաթայ մեկնեցաւ։ Հոս խիտ յայտագիր մը կը սպասէր խումբը։ Կարգով այցելութիւններ կատարուեցան՝ երկրաշարժէ վնասուած Անտիոքի րաբունարանին, Հապիպի Նեճճար մզկիթին, Ուլու Ճամիին եւ Ս. Պետրոսի տաճարին։ Իֆթարի սեղանին խօսք առին կրօնապետներ, ընդ որս Հրեայ Րաբունապետ Տիար Հալեվա, Հայոց Ամենապատիւ Պատրիարք Սահակ Բ., Տիեզ. Պատրիարք Ն.Ս. Բարթողիմէոս եւ յանուն Դիւանագիտական Մարմնի՝ Խրվաթիոյ Աւագ Հիւպատոս Տիկ. Իվանա Զերեց։ Ապա տեղի ունեցան զանազան լեզուներով հոգեւոր երգերու կատարումներ, ընդ որս հայերէն Տէր Ողորմեա, Արժնպ. Տ. Շիրվան քահանայի երգեցողութեամբ։
Յետ Իֆթարի սեղանին, հիւրերը պատուուեցան տեղւոյն շքեղ մէկ թեյարանին մէջ, որմէ ետք գիշերուան ուշ ժամերուն մեկնեցան դէպի Իսթանպուլ։
