Ներման Միջազգային Կազմակերպութիւնը յայտարարութիւնով մը զգուշացուց Ժողովուրդներու Ժողովրդավարութեան Կուսակցութեան փակման որոշումին հետեւանքներուն մասին։ Կազմակերպութենէ կատարուած յայտարարութեան մէջ կը նշուի թէ երկրի երկրորդ մեծագոյն ընդդիմադիր կուսակցութեան արգիլումը խօսքի ազատութեան ուղղուած ծանր հարուած մը պիտի ըլլայ։ Կը նշուի թէ 1993 թուականէն այս կողմ քրտական խնդիրը օրակարգի բերող ութը կուսակցութիւններ օրէնքի ուժով ագիլուած են։ «Քրտական քաղաքական շարժումը արգիլելու գլխաւոր պատրուակը կը ներկայացուի ՓՔՔ զինեալ կազմակերպութեան հետ անոնց ունեցած սերտ յարաբերութիւնը։ Բայց նշենք որ ՓՔՔ-ի հիմնադրութենէն շատ աւելի առաջ, 1971 թուին Թուրքիոյ Բանուորական Կուսակցութիւնն ալ քրտական խնդիրը օրակարգի բերելուն պատճառաւ արգելափակուած էր»։
Այս մէջբերումներէ ետք կազմակերպութիւնը կոչ կ՚ընէ Թուրքիոյ դատական մարմիններուն, միջազգային իրաւաբանութեան սկզբունքներու ծիրէն ներս ստանձնած պատասխանատուութիւնները յարգելու համար։
Նշենք թէ ներկայիս շարունակուող դատական գործընթացը մեկնարկած էր թուրք ազգայնական Ազգային Շարժում Կուսակցութեան յարատեւօրէն ներկայացուցած բողոքներով։
Այս պահու դրութեամբ, ընտրութիւններու ընդառաջ կուսակցութիւնը փակելու ուղղեալ հաւանական վճիռի մը հետեւանքները շրջանցելու միտումով որոշած է ընտրութիւններուն մասնակցիլ Կանանչ Ձախ Կուսակցութիւն անուան տակ։
Ազգային Շարժում Կուսակցութիւնը այստեղ եւս առիթը շահագործելով դիմում կատարած է Ընտրութեան Վեհագոյն Խորհուրդին, Ժողովուրդներու Ժողրովրդավարական Կուսակցութեան դիտորդներուն արգելք բերելու նպատակաւ։ Խորհուրդը իսկոյն ընդառաջած է ազգայանական շարժումի այս պահանջին եւ արգիլած է ՀՏՓ-ի օրէնքներով ապահոված դիտորդական իրաւունքը։
