«Կալերի Պիրզամանլար» կը պատրաստուի ցուցահանդէսի մը, որ նիւթ կ՚ունենայ Անտիոք եւ Իսքենտերուն քաղաքներու ու Մուսա Լերան 100 տարի առաջուան համայնապատկերը։ Այս մասին կալերիի վարիչ Օսման Քէօքէր մամուլին տուած բացատրութեան մէջ կը նշէ թէ 6 Փետրուարի երկրաշարժը բացի բազմաթիւ կեանքէր խլելէ, քաղաքներու պատմամշակութային յատկանիշներն ալ աւերեց։
«Իբրեւ «Պիրզամանլար» հրատարակչութիւն տարածաքաշրջանի երբեմնի բազմամշակութային յատկութիւնը նկարագրող ցուցահանդէսի մը ձեռնարկեցինք։ 18 Ապրիլին մեկնարկող եւ մինչեւ 10 Յունիս շարունակելի ցուցադրութեան ընթացքին պիտի փորձենք քովընտի աշխատութիւններով մշակութային ժառանգի պահպանման միջոցները ուսումնասիրել ու նաեւ աղէտեալ հասարակութեան ալ զօրակցութիւն ապահովել։ Այս առումով որոշած ենք «Անտիոք, Իսքենտերուն եւ Մուսա Լերան Հայերը» անուն գիրքի վաճառքէն գոյացած հասոյթը փոխանցել Թուրքիոյ վերջին հայ գիւղը համարուած Վաքըֆգիւղի վերաշինութեան» ըսաւ Օսման Քէօքէր։
Ծ.- «Կալերի Պիրզամանլար» Վալիքոնաղը փողոց, թիւ 23, 6-րդ յարկ Նիշանթաշ Հեռ. 0212 247 19 07
