«Յանկարծ» թատերախումբը կը պատրաստուի Ուիլեամ Սարոյեանի «Իմ Սիրտը Լեռներում է» անուն թատրերգութեան առաջին ներկայացումին, որ պիտի կատարուի 28 Ապրիլ ուրբաթ երեկոյ Մոտա Սահնէսի անուն թատերասրահին մէջ։
«Յանկարծ» այս տարի կը լրացնէ հիմնարկութեան հինգերորդ տարին։ Խումբը նախապէս ներկայացուցած էր պոլսահայ բանաստեղծուհի Հերանոյշ Արշակեանը ծանօթացնող «Մեր չունեցածը իրարմոք գտնենք» եւ Զաւէն Պիպէռեանին Պէյրութեան ապրումներէն ներշնչուելով գրի առած «Գանձը» անուն պատմուածքի բեմադրութիւնը։
Ուիլեամ Սարոյեանի «Իմ Սիրտը Լեռներում է» անուն պատմուածքը ապսուրտ թատրոնի առաջին օրինակներէն կը համարուի, քանի ան գրուած է Էօժէն Իյոնէսքոյի «Ճաղատ Երգիչը» եւ Սամվէլ Պեքետի «Կոտոն Սպասելով» անուն գործերէն աւելի կանուխ թուականի մը։
Սարոյեան այս գործին մէջ կը նկարագրէ 1914-ի Ֆրէզնոն, ուր մոլորած, կարծես աշխարհէն դուրս մնացած Շեքսպիրի դերակատար Մեք Կրեկորի տարեց մայր մը, որդին եւ թոռներէն բաղկացող ընտանիքի ոդիսականը։
«Յանկաղծ» ի այս բեմադրութիւնը հանդիսատեսը կը մղէ արմատներու, հողի, յիշողութեան, պատկանելութեան եւ կարօտի նման ընկալումներու մասին մտածելու։
Այս բեմադրութեան մէջ իբրեւ դերասան պարտականութիւն ստանձնած են Անդրանիկ Պաքըրճըօղլու, Արթուն Կեպենլիօղլու, Պարեթ Չիլ, Տիյանա Չիլինկիրեան, Տիգրան Փեշթեմալճըկիլ, Կարինէ Մարալ Չիզմէճիեան, Լարա Նարին, Նշան Շիրինեան, Սեւատա Խաչիկ Տեմիրճի եւ Եղիա Աքկիւն։
Չաղտաշ Էքին Շիշմանի բեմադրած խաղը թրքերէնի թարգմանուած է Էճէ Էրօղլուի կողմէ։ Ալթուղ Եըլմազ իբրեւ խորհրդատու, Պարեթ Չիլ բեմադրութեան օգնական, Իզապել Կիւլթոփ բեմայարդարման, Պուրաք Քաջի տարազներու եւ որմազդի ձեւաւորման, Սիպիլ Արսէնեան երաժշտութեան, Իւլքիւ Շահին դիմայարդարման, Ալի Փոյրազ լուսաւորման պաշտօնները ստանձնած են։ Ժպիտ Թոփարլաքը կը կատարէ բեմէ համադրութիւնը եւ իրեն կ՚ընկերակցին Էճէ Նուր Աթէշ եւ Անեթ Սանտրա Աչըքկէօզ։
