12Մարտ կիրակի օր, ի վերջոյ կայացաւ Պէյօղլուի եկեղեցեաց թաղական խորհուրդի խնդրայարոյց ընտրութիւնները։ 5689 ձայներով այս ընտրութիւնը գերազանցած եղաւ նախորդ բոլոր օրինակները։ Ընտրութեան աւարտին ձայներու ջախջախիչ մեծամասնութեամբ յաղթական հանդիսացաւ Աքսել Թոփալեանի գլխաւորած Սպիտակ ցանկը։
Ընտրութեան մասնակցեցան Իսթանպուլի երկրորդ ընտրատարածքի հայ բնակիչները վեց ընտրամասերու տեղադրուած 22 սնտուկներու մէջ քուէարկելով։ Մրցակից խումբերէն Դեղին ցանկը 20,4 տոկոսով յաջորդեց Սպիտակներուն, որոնք նուաճած էին ձայներու 53,6 տոկոսը։
Ընտրութեան Կարգադիր Յանձնախումբը յայտարարութիւնով մը հաղորդեց թէ 14 Մարտին ընտրութեան արդիւնքները եւ առնչուած փաստաթուղթերը Իսթանպուլի Առաջին Շրջանային Տնօրէնութեան յանձնելով աւարտած են իրենց վստահուած պարտականութիւնը։
Յայտարարութեան մէջ յատուկ շնորհակալութիւն կը յայտնուի Սամաթիոյ, Ֆերիգիւղի, Գարակէօլեան Որբանոցի եւ Օրթագիւղի թաղական խորհուրդներուն իրենց զօրակցութեան համար։
Յատուկ շնորհակալութիւն կը յայտնուի նաեւ Սեւան Հատտէլերի, Սերտար Քասափճըլարի եւ ընտրամասերու մէջ պաշտօն ստանձնող կամաւորներու ու դիտորդներու։
«Վերջապէս յաղթանակած Լուսաւոր Ապագայ կոչումով Սպիտակ ցանկի թեկնածուները կը շնորհաւորենք եւ այս նոր պարտականութեան մէջ յաջողութիւն կը մաղթենք» ըսուած է ընտրութեան կարգադիր յանձնախումբի յայտարարութեան մէջ։
Ընտրութենէ ետք ատենապետ Աքսել Թոփալեան «Ակօս»ին յայտնեց թէ համայնքը իրենց պարտականութիւն մը շնորհած է եւ հինգ տարի պիտի աշխատին իրենց ուղուած վստահութիւնը արդարացնելու համար։
