Ն.Ա.Տ. Սահակ Բ. Սրբազան Պատրիարք Հայրը 10 Մարտ 2023, Ուրբաթ առաւօտ ձեռնարկեց հովուապետական այցելութեան դէպի Հաթայ նահանգը, ուր թէ մեր փոքրաթիւ համայնքները, որոնք ազդուած էին նիւթապէս եւ բարոյապէս, նաեւ սոյն նահանգի մեր աղօթատեղիները՝ վնասուած։
Մեր Հոգեւոր Պետը, ընկերակցութեամբ գաւազանակիր Արժ. Տ. Շիրվան Քհնյ. Միւրզեանի, ժամը 8.50-ին օդային ճամբով հասաւ Ատանա եւ Շաքիր Փաշա Օդակայանի պատուոյ սրահին մէջ դիմաւորուեցաւ Գաւառի Համայնքներու Տեսուչ՝ Արժ. Տ. Աւետիս Քհնյ. Թապաշեանի եւ Իսկենտէրունի Ս. Քառասնից Մանկանց Եկեղեցւոյ Ծխական Խորհուրդի Ատենապետ՝ Եուսուֆ Թապաշեանի կողմէ։
Նորին Ամենապատուութիւնը, որ Մեծ Պահոց ընթացքին ամէն օր հովուապետական այցելութիւն կը շնորհէ մեր եկեղեցիներուն, նախագահելով Արեւագալի նաեւ Կիրակնօրեայ Ս. Պատարագի արարողութեանց ու Բանին Կենաց քարոզութեամբ կը մխիթարէ հաւատացեալ ժողովուրդը, այս անգամ առիթը գտաւ մէկտեղուելու աղիտահար մեր ժողովուրդին, անոնց ցաւը ամոքելու եւ յայտնելու Պատրիարքական Աթոռի գլխաւորութեամբ մեր ժողովուրդի զօրակցութիւնը։
Հովուապետական սոյն այցելութեան ընթացքին մեր Հոգեւոր Պետը առիթը ունեցաւ հանդիպումներ ունենալու Հաթայի Կուսակալ՝ Ռահմի Տօղանի, նաեւ Անտիոքի Մայր Քաղաքապետ Փրօֆ. Տքթ. Լիւթֆի Սավաշի հետ։ Սոյն հանդիպումներուն ներկայ եղան Տ. Շիրվան եւ Տ. Աւետիս Քահանայ Հայրերը, Եուսուֆ Թապաշ եւ Պատրիարքարանի Ընկերային Օժանդակութեան Յանձնախումբի անդամներէն Հերման Քավաֆեան։ Նկատի ունենալով, որ զոյգ պաշտօնարանները ծանրօրէն վնասուած են երկրաշարժէն, մեծայարգ Կուսակալը Նորին Ամենապատուութիւնը ընդունեց ԱՖԱՏ-ի Կեդրոնին մէջ, իսկ քաղաքապետը՝ ԷՔՍՓՕ-ի կեդրոնին մէջ։
Զոյգ հանդիպումներու ընթացքին Նորին Ամենապատուութիւնը իր ցաւակցութիւնը յայտնեց երկրաշարժի պատճառաւ իրենց կեանքերը կորուսած հայրենակիցներուն համար եւ մաղթեց որ Աստուած օգնական ըլլայ իրենց վշտահար պարագաներուն, նաեւ երկրաշարժի ազդեցութիւնը կրողներուն պարգեւէ համբերութիւն եւ տոկալու ոգի։ Նաեւ շնորհակալութիւն յայտնեց գաւառաբնակ մեր ժողովուրդին նկատմամբ ցուցաբերուած ջերմ վերաբերմունքին եւ հոգածութեան համար։ Տեսակցութեանց ընթացքին նկատի առնուեցան աւերուած սրբավայրերու պարագաները եւ գաղափարի փոխանակումներ եղան անոնց վերականգնման հնարաւորութեանց մասին։
Թէ կուսակալը եւ թէ քաղաքապետը շնորհակալութիւն յայտնեցին ցուցաբերուած զգայնութեան եւ փափկանկատութեան համար։
Ամեն. Սրբազան Պատրիարք Հայրը պաշտօնական հանդիպումներէն վերջ ժամը 15.30-ին իր ուղեկիցներով հասաւ Վաքըֆգիւղ, ուր գիւղի մուտքին դիմաւորուեցաւ գիւղապետ՝ Պերճ Գարթունի, նաեւ Ծխական Խորհուրդի Ատենապետ՝ Ճեմ Չափարի եւ անդամներէն Միսաք Հերկելի կողմէ։ Գիւղի մուտքին հանդիպում ունեցաւ գիւղաբնակ մեր ժողովուրդին հետ, շուրջ քսանեւհինգ հոգի։ Այս հանդիպումին ժողովուրդը ազդուած էր վայելած ըլլալով իրենց Հոգեւոր Պետին ներկայութիւնը, ինչ որ մխիթարական էր իրենց համար։ Նորին Ամենապատուութիւնը լսեց իրենց փափաքները, մտահոգութիւնները, հետաքրքրուեցաւ Պատրիարքարանի Ընկերային Օժանդակութեան Յանձնախումբի միջոցաւ կատարուած օժանդակութիւններով ու անոնց արժեւորման ձեւերով, տնօրինեց որ ստուգումներ կատարուին գիւղաբնակ ժողովուրդի անմիջական կարիքներու դիմագրաւման համար։ Գիւղաբնակ ժողովուրդին յայտնեց, որ Պատրիարքական Աթոռը, թրքահայ հաստատութիւնները, Իսթանպուլի մերազն հաւատացեալ ժողովուրդը նաեւ սփիւռքահայ համայնքները կը հետաքրքրուին աղէտեալներու կարիքներով։ Պատրիարք Հայրը քննարկեց նաեւ Մեսրոպ Պատրիարք Մշակութային Կեդրոնի նորակառոյց շէնքը, ինչպէս նաեւ գիւղացիներու վթարուած շէնքերը, այցելեց վրանաբնակ ընտանիքներուն։
Ամեն. Ս. Պատրիարք Հայրը Վաքըֆգիւղէն ետք երեկոյեան իր հետեւորդներով անցաւ Իսքենտէրուն, ուր տեղւոյն հայ համայնքին հետ հանդիպում ունեցաւ ճաշարանի մէջ տեղւոյն Ծխական Խորհուրդի սարքած ընթրիքի սեղանի շուրջ։ Նորին Ամենապատուութիւնը հետաքրքրուեցաւ քաղաքաբնակ մեր փոքրաթիւ ժողովուրդի կարիքներով եւ իրենց եւս յայտնեց Պատրիարքական Աթոռի զօրակցութիւնը, որ կը տարածուէր նաեւ քաղաքէն գաղթած քաղաքացի ժողովուրդի ընտանիքներուն վրայ։
Նորին Ամենապատուութիւնը ընթրիքէն յետոյ իր հետեւորդներով գիշերեց Իսքենտէրունի Լատին Կաթոլիկ Միաբանութեան վանատան մէջ։
Ն.Ա.Տ. Սահակ Բ. Պատրիարք Հայրը, 11 Մարտ 2023, Շաբաթ առաւօտ Իսկենտէրունի Լատին Կաթոլիկ վանատան պատասխանատու երէց՝ Հայր Ճոն Սատրէտտինէն հրաժեշտ առնելով, գաւազանակիր Արժ. Տ. Շիրվան Քհնյ. Միւրզեանի ուղեկցութեամբ այցելեց քաղաքի Սրբոց Քառասնից Մանկանց Եկեղեցին, որու մուտքին դիմաւորուեցաւ Անտիոքի եկեղեցեաց Հոգեւոր Հովիւ եւ Գաւառի համայնքներու Տեսուչ՝ Արժ. Տ. Աւետիս Քհնյ. Թապաշեանի եւ Ծխական Խորհուրդի Ատենապետ՝ Եուսուֆ Թապաշեանի կողմէ։ Նորին Ամենապատուութիւնը քննարկեց եկեղեցւոյ ներքին վիճակը, ինչպէս նաեւ եկեղեցւոյ կից հովուատունը։ Այս վերջինը դժբախտաբար անգործածելի դարձած է։ Երկրաշարժէն ծանրապէս վթարուած է նաեւ եկեղեցւոյ արեւելեան կողմի շէնքը, որ նաեւ եկեղեցւոյ հասութաբեր կալուածն է։ Մեր Հոգեւոր Պետը յայտնեց, թէ կամօքն Աստուծոյ ճարտարապետներու եւ ճարտարագէտներու տեղեկագրին համաձայն կը վերանորոգուի եկեղեցին, նաեւ պատշաճ տնօրինութիւններ կ՚ըլլան եկեղեցւոյ յարակից երկու կառոյցներու մասին։
Նորին Ամենապատուութիւնը այցելեց նաեւ քաղաքի Յոյն Ուղղափառ համայնքի Սուրբ Նիկողայոս եւ Սուրբ Գէորգ եկեղեցիները, ընկերակցութեամբ եկեղեցւոյ վարչութեան ատենապետ՝ Ճոն Թէյմուրի։ Այս այցելութեան ընթացքին խաղաղութիւն մաղթեց իրենց կեանքերը կորցրածներու հոգիներուն եւ Սուրբ Հոգւոյ մխիթարութիւն՝ իրենց ընտանիքներուն։
Պատրիարք Հայրը Իսկենտէրունէն բաժնուելով, ժամը 12.30-ին հասաւ Մէրսին եւ քաղաքի Յոյն Ուղղափառներու Սրբոց Գաբրիէլի եւ Միքայէլի Եկեղեցւոյ մուտքին դիմաւորուեցաւ եկեղեցւոյ հոգեւոր հովիւ՝ Տ. Իսփիր Թէյմուր Քահանայի նաեւ Անտիոքի Յոյն Ուղղափառ համայնքի հոգեւոր հովիւ՝ Տ. Ճոն Տէյլիւէր Քահանայի, վարչութեան Ատենապետ՝ Իսա Շէնկիւլի եւ քաղաքաբնակ Հայ համայնքի անդամներու կողմէ։ Եկեղեցւոյ սրահին մէջ զրոյց ունեցաւ երկրաշարժէ աղիտահար ընտանիքներու հետ եւ աղօթեց, որ Աստուած զօրացնէ իրենց հաւատքը, զօրութիւն եւ համբերութիւն պարգեւէ կեանքի դժուարութեանց յաղթահարման համար։
Նորին Ամենապատուութիւնը ապա այցելեց քաղաքի Լատին Կաթոլիկ Եկեղեցին, ուր դիմաւորռւեցաւ Հ. Րոշան Վարդապետի, Անտիոքի Լատին Կաթոլիկ Եկեղեցւոյ հովիւ Հ. Ֆրանսուա Վարդապետի, նաեւ քաղաքաբնակ Հայ համայնքի անդամներու կողմէ։ Եկեղեցւոյ սրահին մէջ Նորին Ամենապատուութիւնը գլխաւորեց երկրաշարժէ աղիտահար ընտանիքներու եւ Հայ համայնքի անդամներու մասնակցութեամբ սարքուած ճաշասեղանը։ Ճաշի աւարտին Պատրիարք Հայրը աղօթեց եւ հայրական խօսքով մխիթարեց ներկաները եւ մաղթեց որ ժամանակի ընթացքին հաւատքի զօրութեամբ յաղթահարեն իրենց մատնուած դժուարութիւնները եւ նեղութիւնները։
Նորին Ամենապատուութեան այս այցելութիւններուն ընկերացաւ նաեւ Պատրիարքարանի Ընկերային Օժանդակութեան անդամներէն՝ Հերման Քավաֆեան։
Մեր Հոգեւոր Պետը եւ Տ. Շիրվան Քահանան Ատանայէն վերադարձան Իսթանպուլ։ Օդակայանի Պատուոյ Սրահին մէջ ողջերթ մաղթեցին Արժ. Տ. Աւետիս Քահանայ Հայրն ու Եուսուֆ Թապաշեան, որոնք Ատանայէն վերադարձան Իսկենտէրուն։
