5Մարտի առաւօտեան, Ատրպէյճանի զինեալ ուժերու ներթափանցող խումբի յարձակումով զոհուեցան Արցախի ոստիկանութեան 3 ծառայողներ՝ փոխգնդապետ Արմէն Մայորի Բաբայեան, հարիւրապետ Դաւիթ Վալերիի Դանիէլեան եւ տասնապետ Արարատ Թելմանի Գասպարեան։ Իսկ տասնապետ Դաւիթ Աշոտի Յովսէփեան կրծքավանդակէն վիրաւորուեցաւ եւ փոխադրուեցաւ հանրապետական բժշկական կեդրոնը: Աւելի ուշ հաղորդուեցաւ, որ անոր վիճակը կայուն է՝ կեանքին վտանգ չի սպառնար։
Արցախի ոստիկանութենէն յայտնեցին, որ առաւօտեան ժամը 10-ի շուրջ, Ատրպէյճանի զինուժի ներթափանցող խումբը «Խայփալու» կոչուող տեղանքին մէջ թիրախ դարձուց եւ կրակ բացաւ ոստիկանութեան անձնագրային եւ վիզաներու վարչութեան անձնակազմի հերթափոխի ինքնաշարժին վրայ։
Ատրպէյճանական կողմը կեղծ փաստեր ներկայացնելով՝ պնդեց, որ իբր թէ ոստիկանական ինքնաշարժով զէնք կը տեղափոխուէր Հայաստանէն Արցախ: Մինչդեռ իրականութեան մէջ, որեւէ զէնք չէր տեղափոխուեր, այլ՝ ոստիկանութեան ծառայողները Ստեփանակերտէն կ՛երթային դէպի ճամբուն վրայ գտնուող իրենց հերթափոխի վայրը։
5 Մարտին ռուսական կողմը ոչ մէկ տեղեկութիւն փոխանցեց այս մասին, սակայն, 6 Մարտին, Ռուսիոյ պաշտպանութեան նախարարութիւնը հաստատեց, որ նախօրէին Շուշիի մերձակայքը տեղի ունեցած զինուած միջադէպին ընթացքին առաջինը հրազէնը կիրարկուած է ատրպէյճանական կողմէն։
Ռուս խաղաղապահներու այս բացայայտումը ընդվզում յառաջացուցած է ատրպէյճանական կողմի մօտ, ուր անոնք կրկնելով զէնք փոխադրելու պնդումը, սպառնացած են արցախահայութեան ինքնապաշտպանութիւնը ստանձնող պաշտպանական բանակին, պահանջելով այդ կառոյցի զինաթափումը եւ զօրքի լուծարկումը։
