Իսթանպուլի Ֆիլհարմոնիայի Ընկերութեան նախաձեռնութեամբ կազմակերպուած դասական երաժշտութեան փառատօնը կատարուեցաւ 23 Փետրուար եւ 5 Մարտ թուականներու միջեւ։
Կազմակերպութիւնը նախապէս ճշդած էր 9-12 Փետրուար թուականները, որ յետաձգուեցաւ երկրաշարժի աղէտի պատճառաւ։ Գատըգիւղի Մօտա թաղամասի եկեղեցւոյ մէջ կայացող համերգաշարի ընթացքին «Արեւմուտքէն Արեւելք» խորագրի ներքեւ Արթիւր Պաղտասարեան դաշնակահար Մարգրիտ Սարգիսեանի ընկերակցութեամբ Մոցարդ, Հայտըն, Կոմիտաս Վարդապետ եւ Նիքոլ Քալանտարեանէ երգեր մեկնաբանեց։
Տպաւորիչ էր Պաղտասարեանի ելոյթը մանաւանդ երբ ան Կոմիտասի «Անտունին» մեկնաբանելու պահուն դահլիճին բացատրեց երգի բովանդակութիւնն ու իմաստը եւ այս կատարումը ձօնեց երկրաշարժի պատճառաւ անօթեւան մնացողներուն։
