Եւրոմիութիւնը, 20 Փետրուարին, Հայաստանի մէջ սկսաւ Եւրոպական Միութեան քաղաքացիական առաքելութիւնը՝ ընդհանուր ապահովութեան եւ պաշտպանութեան քաղաքականութեան ծիրին մէջ։ Այս մասին «Արեւելք»ը՝ վկայակոչելով Եւրոպական Միութեան հրապարակած մամլոյ հաղորդագրութիւնը։
Առաքելութիւնը պաշտօնապէս կազմուեցաւ խորհուրդի 23 Յունուար 2023ի որոշումով։
«Հայաստան-Ատրպէյճան սահմանի հայկական կողմին մէջ տեղակայման նպատակն է՝ նպաստել Հայաստանի սահմանամերձ շրջաններուն մէջ կայունութեան, հակամարտութենէն վնասուած շրջաններուն մէջ կառուցել վստահութիւն եւ անվտանքութիւն, ինչպէս նաեւ ապահովել միջավայր, որ պիտի նպաստէ Հայաստանի եւ Ատրպէյճանի միջեւ կարգաւորման ջանքերուն, որոնց պիտի աջակցի Եւրոպական Միութիւնը», ըսուած է հաղորդագրութեան մէջ։
Եւրոպական Միութիւնը աւելցուցած է, որ, ընդհանուր առմամբ, Եւրոպական Միութեան առաքելութեան բացառապէս քաղաքացիական անձնակազմին մէջ ընդգրկուած պիտի ըլլան մօտաւորապէս 100 անձեր, ներառեալ՝ շուրջ 50 անզէն դէտեր։
Առաքելութեան հրամանատարութեան կեդրոնը պիտի ըլլայ Հայաստանի Հանրապետութեան Վայոց Ձորի մարզի Եղէգնաձոր քաղաքը։ Եւրոպայի արտաքին գործողութիւններու ծառայութեան Քաղաքային ծրագրաւորման եւ վարման կարողութիւններու գործադիր տնօրէն Սթեֆանօ Թոմաթ պիտի աշխատի իբրեւ Քաղաքային գործողութիւններու հրամանատար, իսկ Մարքիւս Ռիթեր՝ իբրեւ առաքելութեան ղեկավար։
