12 Մարտին կայանալիք Սուրբ Երրորդութիւն եկեղեցւոյ թաղական խորհուրդի ընտրութեան ընդառաջ 20 Փետրուարին կայացաւ մասնակից վեց խումբերու խորհրդանշող գոյներու համար յատուկ վիճակահանութիւն։ Ընտրութեան Կազմակերպիչ Յանձնախումբի ատենապետ Խաչիկ Սարըլըի եւ Կարգադիր Յանձնախումբի կողմէ կատարուած վիճակահանութեան մասնակցեցան նաեւ թեկնածու ցանկերու ներկայացուցիչները։ Այսպէս «Պայծառ Ապագայ» խումբը կը ներկայանայ սպիտակով։ «Երիտասարդ Հզօր Պէյօղլու, Ժողովուրդին Կամքը» կարմիր, «Պէյօղլու Սիրոյ Խմբակ» կապոյտ, «Միասնաբար վստահութեամբ Պէյօղլու» վարդագոյն, «Քաջ Փոփոխութիւն Պէյօղլնու» դեղին, «Սիմոն Չեքեմի Խմբակ» կանանչ գոյներով պիտի ներկայանան ընտրողներուն։ Թեկնածութեան դիմումներու ժամկէտն էր 8 Փետրուարը։ Կարգադիր Յանձնախումբը իրենց կատարուած դիմումները փոխանցեց Վաքըֆներու Առաջին Շրջանային Տնօրէնութեան։ Այս վերջինի կողմէ վաւերացուած ցանկերը կը հրապարակուին Սուրբ Երրորդութիւն, Սուրբ Վարդանանց եւ Սուրբ Գէորգ եկեղեցիներու շրջափակը։ Ընտրողներ յաջորդող եօթը օրերու ընթացքին կրնան ներկայացնել թեկնածուներու դէմ իրենց առարկութիւնները։
