Արցախահայութեան դէմ գործադրուած շրջափակումը հետզհետէ անտանելի կը դառնայ։ 12 Դեկտեմբերէն այս կողմ Լաչին ճանապարհի իբրեւ թէ ատրպէյճանցի բնապահպաններու ձեռամբ արգելափակուելէն այս կողմ 120 հազար արցախահայեր մատնուած են կենցաղային հիմնական պայմաններու անբաւարարութեան երեւոյթին դէմ առ դէմ։ Հիմնականին սննդամթերքի եւ դեղորայքի պաշարները սկսած են սպառիլ։ Արցախի կառավարութիւնը որոշած է սնունդի որոշ տեսականիի համար կտրօններ բաժնել քաղաքացիներուն։ Այս բոլորին վրայ կու գայ աւելնալու ելեկտրական հոսանքի մատակարարման դժուարութիւնները։
Այս նիւթի մասին «Արցախէներգօ» ընկերութեան փոխտնօրէն Տիգրան Գաբրիէլեան բացատրութիւններ տալով նշած է թէ 11 Յունուարէն սկսեալ երկու ժամով պիտի անջատուի Ստեփանակերտի որոշ թաղամասերու եւ շրջաններու ելեկտրականութիւնը։ Մէկ ամսուան շրջափակման պայմաններուն մէջ ուտելիքէն բացի նաեւ հոսանքը սահմանափակ պիտի ըլլայ։
Արցախի մէջ ելեկտրականութիւն արտադրող ջրելեկտրակայաններուն զգալի մասը Ատրպէյճանի վերահսկողութեան տակ անցաւ 2020-ի 44-օրեայ պատերազմէն ետք։ Ասոր իբրեւ արդիւնք՝ շեշտակի կերպով նուազած է ելեկտրականութեան հզօրութիւնը։
Արցախի մէջ կան կասկածներ, որ խանգարումը միտումնաւոր եղած է, որովհետեւ այդ հատուածին մէջ՝ մինչեւ Աղաւնոն Ատրպէյճանին յանձնելը, թեքնիք հարցեր չէին եղած։
«Ե՛ւ հաղորդալարը, ե՛ւ համապատասխան բոլոր նիւթերը թարմացուել են, այդ իսկ պատճառով վթարը որպէս այդպիսին, մեր կարծիքով, ինքն իրեն չէր կարող լինել», ըսաւ «Արցախէներգօ»ի փոխտնօրէն Տիգրան Գաբրիէլեան։
«Արցախէներգօ»ն քաղաքացիները յորդորեց կարելի եղածին չափ խնայողաբար օգտագործել հոսանքը՝ հաւանական յաւելեալ անջատումներէ խուսափելու նպատակով։
Ըստ Արցախի կառավարութեան տուեալներուն՝ նախորդ 4 շաբաթներու ընթացքին Արցախ չէ ստացած առաւել քան 12 հազար թոն կենսական նշանակութիւն ունեցող ապրանքներ։
Կարմիր Խաչի միջազգային կոմիտէն ու Ռուսիոյ խաղաղապահները անոր միայն չնչին մասը մատակարարեցին։ Ուտելիքի շեշտուող սղութեան պատճառով փակուեցան 41 մանկապարտէզներ, 56 նախադպրոցական խումբեր եւ 20 երկարօրեայ ուսումնական հաստատութիւններ։ Ստեփանակերտէն կը շարունակեն ահազանգել, որ շրջափակման պատճառով, Արցախի 120 հազար բնակչութիւնը, որոնց մէջ շուրջ 30 հազար մանուկներ, կանգնած են սովի վտանգին առջեւ։
