Նախորդ թիւը տպագրութեան կը պատրաստ էինք երբ հասաւ Սուրբ Երրորդութիւն Եկեղեցւոյ թաղականութեան ընտրութեան թուականը ճշդելու մասին լուրը։
Համայնքային հաստատութիւններու ընտրութեան գործընթացի ամենահետաքրքրական մրցակցութիւնը յայտնի է որ պիտի կայանայ Պէյօղլուի մէջ։ Արդարեւ այժմէն պատրաստուիլ սկսած են զանազան ցանկեր, որոնք ցարդ պաշտօնական յայտարարութեան մը չեն յանգած։
Իբրեւ վերջին զարգացում նշենք թէ հայրենակցական միութիւններն ալ խորհրդակցական ժողով մը կատարելով մտադրած են ցանկ մը պատրաստել զանազան միութիւններէ անունները քով քովի բերելով։
Այս պահուն զանազան շրջանակներէ ներս մտահոգութիւն կը յայտնուի թէ այսքան մասնատուած ցանկերու մէջէն իշխող թաղականութիւնը կրնայ յաղթանակով դուրս գալ, ինչ որ մեծ անակնկալ մը պիտի ըլլայ բոլորին համար։
