Պատրիարքէ զուրկ տասնամեայ շրջանի ընթացքին կուտակուած, անլուծելի մնացած բոլոր խնդիրները այժմ կը փորձուի լուծել նոյն դերակատարներով։ Դերակատարներ՝ որոնք գլխաւոր պատասխանատուն պէտք է համարուէին առկայ ճգնաժամին։ Անոնք իբրեւ թէ ընտրուած վարչայիններ, երկար տարիներ իրենց անհատական ու անձնական կիրքերով անելի մատնեցին այս համայնքի խնդիրները, հիմա կը ներկայանան որպէս հարց լուծող անուններ։ Ստորեւ կը ներկայացնենք նախորդ հինգշաբթի Պատրիարքարանի մէջ կայացած ժողովի մասին ուղարկուած յայտարարութիւնը։
Ամեն. Տ. Սահակ Բ Պատրիարք Սրբազան Հօր նախագահութեամբ, Պատկ. Կրօնական Ժողովոյ անդամներու եւ համայնքային ու թաղային մարմիններու ատենապետերու մասնակցութեամբ 18 Փետրուար 2020-ին կայացած խորհրդակցական հանդիպումին կազմուած Կեդրոնական Սեղանը Ամեն. Ս. Պատրիարք Հօր հրաւէրով 12 Մարտ 2020, Հինգշաբթի, ժամը 17.00-ին ունեցաւ իր անդրանիկ հանդիպումը, նախագահութեամբ Նորին Ամենապատուութեան։
Նորին Ամենապատուութեան արտասանած Տէրունական Աղօթքով սկսած հանդիպումին, նախ քան օրակարգը առաջարկով խորհրդակցութիւն տեղի ունեցաւ առողջապահական այժմէական հարցին՝ Քորոնա վիրուսի հետ առընչուած լուրերու շուրջ։ Յայտնի դարձաւ թէ այս ծանօթ առողջապահական հարցի կապակցութեամբ պաշտօնական մարմիններ արդէն իսկ պէտք եղած միջոցառումներ ձեռք առած են եւ որոշուեցաւ պետական պաշտօնական զեկոյցներու եւ կամ հրահանգներու ուղղութեամբ ընթանալ ու այս ուղղութեամբ մեր վարժարաններէն ու աղօթատեղիներէն ներս հարկաւոր միջոցառումներու դիմել։
Այս կարեւոր հարցին մասին կատարուած խորհրդակցութենէն յետոյ միաձայնութեամբ որոշուեցաւ նորակազմ սեղանը անուանել «Հայ Հիմնարկներու Միութեան Վարչական Խորհուրդ»։ Այս անունը որդեգրուեցաւ նկատի ունենալով մեր համայնքային ու թաղային հիմնարկներու մէկտեղումը որոշուած էր կոչել «Հայ Հիմնարկներու Միութիւն», որ վերանուանումն էր «Հիմնարկներու Միջեւ Երկը խօսութեան Հարթակ», այսինքն «Վատիփ» անուան։
Ձեռնարկուեցաւ դիւանի կազմութեան, որուն կ՚անդամակցին Պետրոս Շիրինօղլու՝ Ատենապետ, Տիգրան Կիւլմէզկիլ եւ Իսքէնտէր Շահինկէօզ՝ Փոխ Ատենապետներ, Յարութիւն Շանլը՝ Ատենադպիր, Սարվէն Սէրթշիմշէք, Գրիգոր Աւագ Քահանայ Տամատեան։ Խոսրով Քէօլէդաւիթօղլու ստանձնեց աշխատանքային խումբի համակարգչի պաշտօնը։
Յետ խորհրդակցութեան որոշուեցաւ կանոնագրութեանց մշակման աշխատանքները տանիլ ներխմբային խորհրդակցութեամբ եւ նկատի ունենալով ի ձեռին գտնուած կանոնները, ի պահանջել հարկին դիմելով իրաւաբաններու։ Բնականաբար տարուած աշխատանքներէն յետոյ պատրաստելի կանոնագրի շուրջ տեսակցութիւններ պիտի ըլլան պաշտօնական պատկան իշխանութեանց հետ։
Նկատելով որ համայնքային կեանքէն ներս համայնքային եւ թաղային հիմնարկներու միջեւ տնտեսական զօրակցութիւն մը ապահովելու լուրջ պահանջքը կար Ամեն. Ս. Պատրիարք Հօր առաջարկով եւ միաձայնութեամբ կազմուեցաւ Տնտեսական Զօրակցութեան Յանձնախումբը, որուն կ՚անդամակցին Պետրոս Շիրինօղլու, Տիգրան Կիւլմէզկիլ, Իսքէնտէր Շահինկէօզ, Թորոս Ալճան, Սիմոն Չէքէմ, Սարվէն Սէրթշիմշէք, Վարուժ ան Մաղաքեան, Յարութիւն Շանլը, Սէվ Հիմնարկէն՝ Արետ Երկանեան եւ Հայկ Ասլանեան։ Յանձնախումբը կը գլխաւորէ Նորին Ամենապատուութիւնը։
Ամեն. Ս. Պատրիարք Հայրը շնորհակալութիւն յայտնեց ներկաներու մասնակցութեան համար եւ արձակման աղօթքով վերջացաւ հանդիպումը։
