Պատրիարք Սահակ Բ. սրբազան ընտրութեան նախորդող օրերուն «Ակօս» թերթին հետ ունեցած զրոյցի ընթացքին խոստացած էր պատրիարք ընտրուելէ ետք դպրոց ունեցող հաստատութիւններու վարիչներուն հետ համագործակցութեան եւ որոշում կայացնելու կարող մարմին մը հիմնելու մասին իր ծրագիրը։
Գահակալութենէն ամիս մը ետք կը տեսնենք թէ նորընտիր պատրիարքը իր այս խոստումը կեանքի կոչելու համար կը ձեռնարկէ կարգ մը քայլերու։ Այսպէս ան բոլոր թաղական մարմիններու վարիչները խորհրդակցական ժողովի մը հրաւիրած է, որ պիտի կայանայ 18 Փետրուար ժամը 17-ին Պատրիարքարանի մէջ։ Ժողովի ընթացքին պիտի քննարկուի կեդրոնական սեղան մը հաստատելու մասին միտքերը եւ այս ուղղութեամբ կարծիքի փոխանակումներ տեղի պիտի ունենան։ Նախքան այս 10 Փետրուար երկուշաբթի ցերեկուայ ժամերուն եւս խորհրդակցութիւն մը տեղի ունեցաւ Պատրիարքարանի մէջ մասնակցութեամբ «Մարմարա», «Ժամանակ», «Ակօս», «Փարոս» եւ «Լոյս» պարբերականներու խմբագրապետերուն։ Այս ժողովին պատրիարքը դարձեալ օրակարգի բերաւ իր միտքը։ Սոյն ժողովին մասնակցեցաւ նաեւ Կրօնական Ժողովի Ատենապետ Թաթուլ Ծ. Վարդ. Անուշեան եւ Պատրիարքական փոխանորդ Գրիգոր Աւագ Քհնյ. Տամատեան։ Այս հանդիպման ընթացքին պատրիարքը նշեց որ բոլոր հաստատութիւնները առանձին առանձին խնդիրներ ունին, բայց մենք ստիպուած են ամբողջական պատկերին վրայ կեդրոնանալ։ Պատրիարքի համաձայն խնդիրներու լուծումին համար անհրաժեշտութիւն է ունենալ կեդրոնական վարչութիւն մը։ «Դպրոց ունեցող հիմնարկները եւ հիւանդանոցը սեղանի մը շուրջ մէկտեղուին եւ միասնաբար խննենօք մեր խնդիրները» ըսաւ Սահակ պատրիարք։
Ան նաեւ յայտնեց թէ այս առումով բոլոր հաստատութիւններուն կոչ ուղղուած է եւ հինգ էջանոց լուսաբանութիւն մը ղրկուած, որպէսզի այդ հիման վրայ կայանան նաեւ կարծիքի փոխանակումները։
«Սա պատմական պահ մըն է, որու աւարտին կամ կը թեւակոխենք նոր փուլ մը, կամ ալ նախորդ շրջաններու թերութիւնները կը մնան մեր վզին։ Սկիզբ մըն է, որ կը մեկնարկենք պարզապէս» ըսաւ Մաշալեան սրբազան։
Համայնքային հաստատութիւններու ղրկուած հինգ էջանի յայտարարութեան մէջ մանրամասնութիւններ կան նախատեսուած կարգադրութեան համար։ «Մեր համայնքը 1960-էն այս կողմ զրկուած է կեդրոնական վարչութենէ մը։ Համայնքային կեանքի բոլոր փուլերուն կը նկատուի հաղորդակցութեան զգալի պահանջ մը։ Շտապօրէն պէտք է ունենանք մեր եկեղեցւոյ հոգեւոր եւ ընկերային խնդիրները համակարգող որոշումներ կայացնելու կարողութիւն ունեցող ի պահանջեալ հարկին հեռու կամ կարճ հեռանկարով ծրագիրներ մշակելու կարող մարմին մը»։ Նամակին մէջ նշուած է նաեւ թէ նախատեսուած մարմինը պիտի անուանակոչուի «ՄեՄա» այսինքն թրքերէնով կրճատում մը կեդրոնական սեղանի իմաստով։
