ԻՇԽԱՆ ԷՐՏԻՆՉ
ishanerdinc@gmail.com
Նոր տարուայ անդրանիկ համերգը կայացաւ 2 Յունուար Հինգշաբթի օր, Պէյօղլուի Սուրբ Երրորդութիւն Եկեղեցւոյ մէջ։ Այս տարի իր հիմնարկութեան 90-ամեակը նշող Լուսաւորիչ երգչախումբը Կոմիտաս վարդապետէ, Ռոպէր Պետրոսեանէ, Խաչատուր Աւետիսեանէ եւ այլ երգահաններէ ընտրուած 14 երգերէ բաղկացող յայտագիրով մը բեմ ելաւ։
Խմբավար Յակոբ Մամիկոնեանի վարած երգչախումբին դաշնամուրով ընկերակցեցաւ Ռոպէր Տողանայ։ Համերգի մենակատարներն էին Մելինէ Թեմելճի, Մարիա Հազարեան Էրշէն, Մարալ Այվազ Չաղլըչուպուքճու, Շանթ Չաքմաքճեան եւ Սերճան Կազէրօղլու։
Համերգին ներկայ գտնուեցաւ Պատրիարք Սահակ Բ., եկեղեցւոյ երէց Եղիշէ Ծ. Վարդապետ Ուչքունեան, Յարութիւն Վարդապետ Տամատեան, Գրիգոր Տամատեան, Սարգիս Քույումճեան եւ Գէորգ Չընարեան աւագ քահանաները։
Համերգի աւարտին Պատրիարք Սահակ Բ. Հուսկ բանք արտասանեց ու անդրադարձաւ Լուսաւորիչ երգչախումբի 90-ամեակին՝ զայն կոչելով պատմական կաղնի մը։ Գնահատեց երգչախումբի կազմէն ներս երիտասարդներու առկայութիւնը, ըսելով թէ այս երեւոյթը նման է պատմական կաղնիի նոր ճիւղեր արձակելուն։ «Գնահատանքի արժանի կը գտնենք այս ճիւղը եւ կ՚աղօթենք որ ան ալ իր կարգին նոր ճիւղեր գոյացնէ։ Սոյն աշխատանքի մէջ սէր, միասնութիւն եւ ճակտի քրտինք կը տեսնենք։ Այդ բոլորը այս միասնութիւնը վերածած է ընտանիքի մը։ Երաժշտական կարողութեան կողքին, պարզուած այս պատկերն ալ գնահատելի է եւ նոյնքան օրինակելի։ Վստահ եմ, թէ ապագային ալ երիտասարդներ ցանկութիւն պիտի ունենան նման կազմի մէջ տեղ առնելու» ըսաւ Պատրիարքը։
