Կրօնական ծիսակատարութիւնները ժողովրդական մշակոյթի հիմնական բաղադրիչներն են նաեւ։ Սկսելով հեթանոսական շրջաններու քուրմերու, քրմապետերու ծիսական արարողութիւններէն, մինչեւ մերօրեայ կենցաղային ապրումները անբաժան մասնիկն են ժողովրդական մշակոյթին, զոր կը կոչենք ֆոլքլոր։
Այս հաստատումէն մեկնելով վաստակաւոր պարուսոյց եւ արուեստագէտ Ժուլիա Մութլու ձեռնարկած է հայոց մկրտութեան, պսակադրութեան եւ յուղարկաւորութեան ծէսերը բեմադրել, օգտուելով պատշաճ երաժշտութենէ ու պարէ։
Ինչպէս նախորդ տարբեր բնոյթի միջոցառումներուն, այս նախաձեռնութեան մէջ ալ իր գլխաւոր գործընկերն է Ժանին Փափազեանը։ Բեմադրութինը վստահուած է Արամ Կոստանեանին, որ նաեւ կը ներկայանայ իբրեւ սցէնարի հեղինակ եւ ասմունքող։ Թաթիանա Պոսթան, Մարալ Աթաման եւ Մուրատ Փէյնիրճի կը մեներգէն, իսկ Արի Ալիճիեան կը համադրէ երաժշտական կատարումները։
8 Դեկտեմբեր կիրակի երեկոյ ժամը 19.00-ին Պաքըրգիւղի Լէյլա Կենճերի անուան դահլիճին մէջ կայանալիք այս միջոցառումը կասկած չկայ, որ իր եզակի բնոյթով նոր շունչ մը պիտի պարգեւէ պոլսահայ արուեստասէրներուն։
