Նախագահ Էրտողան Միացեալ Նահանգներ այցելութեան ընթացքին ելոյթ մը ունեցած էր Ամերիկայի Կրօնից Տնօրէնութեան մէջ։
Հոն ունեցած ելոյթի ընթացքին Թուրքիոյ նախագահը անդրադարձած էր 1915-ի ցեղասպանութեան եւ ուրացման աւանդական պատգամները քայլ մը առաջ տանելով ըսած էր, թէ հայերը արդէն որպէս թափառիկ ազգ տարբեր երկիրներ կ՚ապրէին։ «Անոնք Թուրքիոյ մէջ ալ զանազան վայրեր շրջելէ ետք վերջապէս տարագրուեցան»։ Էրտողան նաեւ արհամարհած էր Հայաստանի Հանրապետութիւնը գործածելով «Տակաւին երեկուան պետութիւնը» խօսքը։
Թուրքիոյ նախագահը շարունակած էր իր անհիմն պնդումներուն, ըսելով թէ 2009-ին ստորագրուած բանաձեւը չէ վաւերացուած հայոց կողմէ։ Այս ըսելու ժամանակ անշուշտ Էրտողան չի յիշեր թէ բանաձեւը չէր վաւերացուած ստորագրուելէ վերջ անոր մէջ մտցուած Ղարաբաղեան նախապայմանի պատճառաւ։ Այդ նախապայմանը բանաձեւի ստորագրութենէ վերջ է որ թրքական կողմը իբրեւ պահանջ պարտադրեց Հայաստանին եւ Հայաստանն ալ բնականաբար հրաժարեցաւ աղաւաղուած բանաձեւը ստորագրելէ։
Նախագահ Էրտողանի պատմութիւնը խեղաթիւրող այս ելոյթին դէմ առարկեց Հայաստանի Արտաքին Գործոց Նախարարութիւնը դիտել տալով թէ Էրտողան արդէն 2019-ին Ապրիլ 24-ին հրապարակած ուղերձով ցեղասպանութիւնը ներկայացուցած էր իբրեւ լաւագոյն կանխամիջոց։ Իսկ ցեղասպանութեան զոհերը ներկայացուած էր, որպէս ահաբեկիչներ։ «Իսկ այժմ Էրտողան ուրանալով իր ազգի պատմութիւնը հայոց ցեղասպանութեան զոհերուն կը յանդգնի թափառական ըսել։ Այսպէսով ան կը փորձէ հայոց հայրենիքն ալ ուրանալ»։
Միւս կողմէ ՀՏՓ-ի պատգամաւոր Կարօ Փայլան եւս դատապարտեց նախագահի այս խօսքերը, պնդելով թէ Էրտողան լծուած է ցեղասպանութիւնը փառաբանելու դժբախտ գործին։
