Հնագէտ Հադիճէ Քըլըչասլան պաշտօնական արտօնութիւնով պեղումներու ձեռնարկած է Մարաշի Տուլքատիրօղլու աւանի Իսատիվանլը թաղի մէջ։
Հնագէտի արտայայտութեամբ երեք օր տեւելիք պեղումներուն պիտի հսկեն շրջանի Մշակութային հարստութեան պահպանման խորհուրդի պաշտօնեաները եւ ոստիկանները։ Պեղումներու համար կ՚օգտագործուի ծանր մեքենաներ։
«Այս տարածքը, թէ հայաբնակ վայր եղած է եւ թէ կը յիշուի իբրեւ հրէից թաղ։ Կը կարծենք թէ այստեղ սենեակներ պիտի յայտնաբերենք։ Աւելի շատ թեխնիքական սարքերու կարիքը ունինք։ Ուսումնասիրութիւններով հաստատած ենք, թէ այս տարածքը նախապէս ապարանք մը եղած է, որուն սենեակներէն մէկուն մէջ խիստ հաւանական է, որ գանձ մը գտնուի»։
Ժողովուրդներու Ժողովրդավարութեան կուսակցութեան ասորի պատգամաւոր Թումա Չելիք նիւթը փոխանցած է Խորհրդարանի օրակարգին։ Չելիք Մշակոյթի եւ զբօսաշրջութեան նախարար Նուրի Էրսոյին փոխանցեց հետեւեալ հարցումները.
Ա- Ի՞նչ տեղեկութիւններ եւ փաստեր ունիք տուեալ տարածքին մէջ գանձի մը գոյութեան համար։
Բ- Բոլորովին կատրուա՞ծ է գանձախոյզութեան յատուկ կանոնադրութեան բոլոր պայմանները։
Գ- Թանգարանի տնօրէնութիւնը թոյլտուութիւն տրուա՞ծ է։
Դ- Պեղումի տարածքին հաւանական յայտնուելիք հնագիտական կամ մշակութային գտածոներու համար կանխամիջոցներ ապահովուա՞ծ են։ Քանի՞ մասնագէտ կ՚ընկերակցի պեղումներուն։
Ե- Մարաշի Տուլքատիրօղլու գաւառին մէջ գրանցուած քանի՞ պատմական շինութիւն ունի։ անոնցմէ քանի՞ն եկեղեցի եւ քանի՞ն սինակոկ է։
Զ- Մարաշի մէջ վերջին հինգ տարիներու ընթացքին քանի՞ հնութիւն նորոգուած կամ նորոգութեան ձեռնարկուած է։
Է- Նախարարութեան տուեալներուն համաձայն 2014-2018 թուականներու միջեւ 461 գանձախոյզութիւն գրանցուած է։ Այդ պեղումներու մէջ որեւէ հնութիւն յայտնաբերուա՞ծ է։ Եթէ յայտնաբերուած է անոնց համար ի՞նչ վճարում կատարուած է։
Ը- Թուրքիոյ մէջ քանի՞ հոգի գանձ փնտռելու արտօնութիւն ունի։
Թ- Գանձախոյզութիւնը արգիլելու համար օրէնքի աշխատութիւն մը ունի՞ք։
Ժ- Ապօրէն գանձախոյզութիւնը կանխելու համար որեւէ ծրագիր մը մշակա՞ծ էք։
ԺԱ- Ապօրէն պեղումներու պատճառաւ վերջին հինգ տարիներու ընթացքին քանի՞ հոգիներու դէմ հարցաքննութիւն կատարուած է։
