Երբ ամբողջ հայաշխարհ կը վերյիշենք նուիրեալ գործիչի մը՝ Շառլ Ազնաւուրի մահուան Ա. տարելիցը Ֆրանսայի մէջ ալ կը տիրէ հետաքրքրական եւ յուզումնալից զարգացումներ։ Արդարեւ Ազնաւուր Հիմնադրամը մեծ վարպետի կիսանդրին կը նուիրէ Փարիզի քաղաքապետարանին, որ իր կարգին որոշած է ան տեղադրել Ազնաւուրի մանկութեան անցած թաղամասը։
Կասկած չկայ, թէ Փարիզ եւ Ազնաւուր իրար ամբողջացնող անուններ եղած են եւ այս մեծ հայը, որքան իր հայ ինքնութեան, նոյնքան ալ փարած է Ֆրանսայի, ֆրանսերէնի եւ այս երկրի հետ կապուած բոլոր արժանիքներու։
Կիսանդրին քանդակուած է Ալիս Մելիքեանի կողմէ 1964 թուին, երբ Ազնաւուր առաջին անգամ կ՚այցելէր Հայաստան։
Կիսանդրիի յանձնման արարողութեան ընթացքին Հիմնադրամի համահիմնադիր Նիքոլա Ազնաւուր կ՚ըսէ թէ Շառլ Ազնաւուրը սերտօրէն կապուած է Փարիզի հետ եւ Հիմնադրամը անկեղծօրէն երախտապարտ է Փարիզի քաղաքապետարանին այս միջոցառման ու հետագային կիսանդրին տեղադրելու հարցին ցուցաբերած մեծ պատրաստակամութեան եւ աջակցութեան համար։
Կիսանդրիի յանձնման արարողութեան ներկայ գտնուեցան Ազնաւուրի ընտանիքի անդամները, ընկերները, ֆրանսացի պաշտօնեաներ եւ հայ համայնքի ներկայացուցիչներ։
