ՄԱԿ-ի ծիրէն ներս գործող «Բռնութեամբ եւ ակամայ զոհերու վերաբերեալ աշխատակազմը» 1915-1923 թուականներու միջեւ տեղահան եղած հայերու մասին հարցաթերթիկով մը դիմեց Թուրքիոյ։
ՄԱԿ-ի «Մարդու իրաւունքներու բարձրագոյն կոմիսարութեան» պաշտօնական կայքէջի մէջ հրատարակուած հարցումները հետեւեալներն են.
ա) 1915-1923 թուականներու միջեւ պարտադիր ներքին աքսորի ենթարկուած, ձերբակալուած, առանց դատուելու սպաննուած եւ բռնիօրէն կորուստի մատնուած հայերու ճակատագիրը լուսաբանելու համար ի՞նչ աշխատութիւն կատարուած է։
բ) Տուժածներուն եւ աւելի ընդհանուր առմամբ հասարակութեան այս մասին տեղեկութիւն քաղելուն, արդարութեան, ձեռք դրուած ինչքերուն հատուցման առումով ո՞ր միջոցներուն դիմուած է։
գ) Այս դէպքերու ընթացքին մահացած հայոց դիակները յայտնաբերելու համար ի՞նչ աշխատութիւն կատարուած է։
Փաստաթուղթը բացատրութիւն կը պահանջէ 2017-ին ընդունուած եւ օրէնսդիր մարմնի ներկայացուցիչներուն կողմէ կարգ մը բառերուն գործածութիւնը արգիլուած բանաձեւի ընդունման պատճառներու մասին։ Յատկապէս կը հարցուի թէ ինչպէ՞ս կը կիրարկուի համաշխարհային մարդու եւ քաղաքական իրաւունքներու համաձայնագրի 19-րդ յօդուածը։
Մանրամասնութիւններ կը պահանջուի Հայոց ցեղասպանութեան մասին արտայայտուողները պատժելու համար գործադրուած Պատժական օրէնքի 301-րդ յօդուածի կիրարկումներու մասին։
ՄԱԿ-ի հարցաթերթիկի կողքին նշուած է, թէ սոյն հարցումները պատասխանելու համար Թուրքիոյ դէմ սահմանուած է 60 օր։ Քաղուած տեղեկութեան համաձայն Թուրքիա 17 Մայիսին յայտարարած է, որ բացարձակապէս կը մերժէ այս հարցումներուն պատասխանել։
Լրատուութիւնը քաղուած է «Էրմենի հապեր» կայքէջէ։
