Թուրքիոյ Հայոց Պատրիարքարանի կողմէ հրատարակուած զեկոյցով մը յայտնի կը դառնայ թէ 27 Յունիս Հինգշաբթի առաւօտ Պատրիարքարանի դահլիճին մէջ կայանալիք ժողովով տեղի պիտի ունենայ տեղապահի ընտրութիւն։ Զեկոյցի մէջ կը շեշտուի թէ ընտրութիւնը պիտի ըլլայ սահմանադրութեան կանոններու եւ նախկին աւանդութեան համաձայն։ Սակայն ի տարբերութիւն նախկին տեղապահի ընտրութենէն այս անգամ ընտրութիւնը տեղի պիտի ունենայ միայն Պոլսոյ մէջ գործող երկու եպիսկոպոսներու՝ Արամ Աթէշեանի եւ Սահակ Մաշալեանի միջեւ։ Այս պարտադրանքին դէմ նախապէս տեղապահ ընտրուած Գարեգին Արք. Պէքճեան «Ակօս»ին յայտնեց թէ սխալ է տեղապահի ընտրութիւնը միայն Պոլիս գործող հոգեւորականներով սահմանելու որոշումը։ Պեքճեան սրբազան իր առարկութիւնները պարզեց հետեւեալ կերպով. «Նախ եւ առաջ մեր կանոնադրութեան մէջ պատրիարքի փոխանորդ ըսուած կոչում մը գոյութիւն չունի։ Մնաց որ պատրիարքի վախճանումէն ետք ամբողջովին անիմաստ է փոխանորդի մասին խօսիլ։ Զեկոյցին մէջ նշուած նախկին գործադրութիւնները ինքնին սխալ էին եւ սխալը չի կրնար օրինակ հանդիսանալ։ Մեսրոպ Պատրիարքի հիւանդութենէն ետք հնարուած ընդհանուր փոխանորդի աթոռը պատրիարքական աթոռի անպատշաճ կերպով գրաւումն է։ Այն ատենն ալ կատարուած ընտրութիւնը օրինական չէր, քանի որ ոչ ես եւ ոչ ալ Սահակ սրբազան հրաւիրուած էինք այդ ժողովին։ 2017-ի տեղապահի ընտրութեան պետութեան կողմէ անվաւեր մնալու պատճառը պատրիարքին կենդանի ըլալն էր։ Այդ օրուայ պայմաններու մէջ դիւրիմացութիւնները վերացնելու համար ուզեցի պետական իշխանութիւններու հետ խօսիլ, բայց Արամ սրբազան եւ Պետրոս Շիրինօղլու չգործադրեցին իմ խնդրանքը։ Ափսոս որ Արամ սրբազան կը ոտնակոխէ եկեղեցական վերի իշխանութիւնը եւ կ՚անտեսէ Կաթողիկոսին իմ ընտրութիւնը վաւերացնելու կամքը։ Տեղապահի ընտրութիւնը պատրիարքարանի եպիսկոպոսներով սահմանելու մասին ո՛չ մէկ նշում կայ սահմանադրութեան մէջ։ Ընդ հակառակը Երուսաղէմի Պատրիարքարանը նման հանգամանքը նշած է։
Արամ սրբազան իմ տարիքիս եւ առողջութեանս մասին մեկնաբանութիւններ կ՚ընէ։ Այս ըրածը ամօթ է։ Արամ սրբազան կը պնդէ թէ պոլսահայութեան մեծամասնութիւնը իր կողքին է։ Տեղին կ՚ըլլայ այս մասին կարծիք յայտնելէ առաջ լուրջ քննարկում մը ունենալ։ Կ՚արժէ հարցնել արդեօք կեղծ ուրախութիւնները իրական արդիւնքներ կրնա՞ն տալ։
Կրօնական ժողովի որոշումը բոլորովին սխալ է։ Պէտք էր զիս հրաւիրէին։ Պէտք էր բոլորը հրաւիրէին։ Ընդհանուր փոխանորդի ընտրութիւնը աճպարարութեամբ կատարողները հիմա ալ նոյն ձեւով որոշումներ կը կայացնեն։ Իմ Պոլիս գտնուած ժամանակ տեղի ունեցած ժողովներուն ալ ո՛չ մէկը կը համարձակէր առարկութիւն մը ընելու։ Յայտնի է որ նոյն խարդախութիւնը կը շարունակուի» ըսաւ Պէքճեան սրբազան։
